ກະຊວງ ຮສສ ແຕ່ງຕັ້ງຫົວໜ້າສູນບໍລິການຈັດຫາງານຜູ້ໃໝ່

18

ຂປລ. ໃນວັນທີ 14 ກັນຍາ 2021 ທີ່ກະຊວງ ແຮງງານ ແລະ ສະຫວັດດີການສັງຄົມ (ຮສສ), ໄດ້ມີການປະກາດການຈັດຕັ້ງ ຫົວໜ້າສູນບໍລິການຈັດຫາງານຜູ້ໃໝ່, ໂດຍຕົກລົງແຕ່ງຕັ້ງ ທ່ານ ສຸລິຍາ ຄຳວົງສາ ຂຶ້ນເປັນຫົວໜ້າສູນບໍລິການຈັດຫາງານ ແລະ ທັງໄດ້ບົ່ງໂຕແຕ່ງຕັ້ງຂຶ້ນເປັນເລຂາໜວ່ຍພັກສູນບໍລິການຈັດຫາງານ, ກະຊວງ ແຮງງານ ແລະ ສະຫວັດດີການສັງຄົມ, ສ່ວນຜູ້ເກົ່າ ໄປຮັບໜ້າທີ່ໃໝ່. ໃຫ້ກຽດເຂົ້າຮ່ວມຂອງ ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງ ຮສສ, ພ້ອມດ້ວຍພະນັກງານຫລັກແຫລງ ຮສສ ເຂົ້າຮ່ວມ.

ໂອກາດດຽວກັນນີ້, ທ່ານ ປະເດີມພອນ ສົນທະນີ ໄດ້ໃຫ້ກຽດໂອ້ລົມ ແລະ ສະແດງຄວາມ ຊົມ ເຊີຍຕໍ່ ຄະນະສູນທັງຜູ້ໃໝ່ ແລະ ເກົ່າ, ພ້ອມດ້ວຍພະນັກງານຫລັກແຫລ່ງ ໂດຍສະເພາະເພື່ອແນ່ໃສ່ເຮັດສຳເລັດພາລະໜ້າທີ່ວຽກງານສຳຄັນດັ່ງກ່າວ ທີ່ພັກ ແລະ ລັດມອບໝາຍໃຫ້ນັ້ນ ທຸກຄົນຕ້ອງໄດ້ສືບຕໍ່ປັບປ່ຽນທັດສະນະຄະຕິໃໝ່, ປັບປ່ຽນຫລັກການ ແລະ ລະບອບແບບແຜນວິທີນຳພາ ແລະ ວິທີເຮັດວຽກໃໝ່ໃຫ້ສົມຄູ່ກັບໜ້າທີ່ໃໝ່ ໃຫ້ກາຍເປັນການນຳທີ່ດີຂອງພັກ ແລະ ລັດເຮົາ ເປັນຕົ້ນ: ສືບດ້ານການເມືອງ-ແນວຄິດ ຕ້ອງໜັກແໜ້ນມີຫລັກໝັ້ນ, ບໍ່ຄອນແຄນຕໍ່ບັນຫາຕ່າງໆທີ່ເກີດຂຶ້ນ, ຕ້ອງໄດ້ເພີ່ມທະວີໃຫ້ມີຄວາມສະຫງົບ ແລະ ມີຄວາມສາມັກຄີພາຍໃນ-ພາຍນອກ ໃຫ້ເປັນປຶກແຜ່ນແໜ້ນໜາ, ໃຫ້ຢຶດໝັ້ນ ແລະ ປະຕິບັດຫລັກການລວມສູນປະຊາທິປະໄຕ, ນຳພາ ແລະ ເຮັດວຽກເປັນໝູ່ຄະນະ, ປຶກສາຫາລື ແລະ ຕົກ ລົງເປັນໝູ່ຄະນະ, ເອົາໃຈໃສ່ຊຸກຍູ້ຕິດຕາມ, ກວດກາ, ສະຫລຸບ, ຕີລາຄາ, ປະເມີນຜົນ, ທອດຖອນບົດຮຽນນໍາກັນເລື້ອຍໆ ແລະ ບັນຫາອື່ນໆ.

ພ້ອມນີ້, ທ່ານ ຍັງໄດ້ເນັ້ນຕື່ມ ເພື່ອເຮັດສຳເລັດໜ້າທີ່ການເມືອງ, ທັງວຽກວິຊາສະເພາະ ອັນສູງສົ່ງ ທີ່ໄດ້ຮັບມອບໝາຍຈາກພັກ ແລະ ລັດ ຄັ້ງນີ້, ໃນນາມຕາງໜ້າຄະນະນຳກະຊວງ, ຂໍຮຽກຮ້ອງໃຫ້ທຸກສະຫາຍ ຈົ່ງຕັ້ງໜ້າເອົາໃຈໃສ່ນຳພາ ແລະ ຊີ້ນຳວຽກງານທີ່ພັກ ແລະ ລັດມອບໝາຍໃຫ້, ໃຫ້ໄດ້ຮັບສຳເລັດຜົນເປັນຢ່າງດີ ແລະ ຮຽກຮ້ອງມາຍັງພະນັກງານ, ສະມາຊິກພັກທັງໝົດພາຍໃນສູນ ຈົ່ງໄດ້ເອົາ ໃຈໃສ່ໃຫ້ການຮ່ວມມືສະໝັບສະໜູນຊ່ວຍເຫລືອສະຫາຍ ເພື່ອເຮັດສຳເລັດໜ້າທີ່ການເມືອງ ທີ່ຮັບມອບ ໝາຍຈາກພັດ-ລັດຖະບານ ໃຫ້ມີຜົນສຳເລັດເປັນຢ່າງດີ.
ຂໍ້ມູນ: ກະຊວງ ຮສສ