ເຈດີບີ ມອບລົດ ໂຕໂຍຕາ ປຣາໂດ ໃຫ້ລູກຄ້າ ເປັນປີທີ່ 4 ໃນໂຄງການຝາກປະຈໍາ 4 ປີ

ທະນາຄານຮ່ວມພັດທະນາ(ເຈດີບີ) ໄດ້ຈັດພິທີມອບລາງວັນທີ່ 1 ຊື່ງເປັນລົດໂຕໂຍຕາ ປຼາໂດ ໃຫ້ລູກຄ້າທີ່ໂຊກດີຈາກການຈັບສະຫຼາກຊິງໂຊກ ບັນຊີເງີນຝາກປະຈໍາ ປີທີ່ 4 ຂອງທະນາຄານຮ່ວມພັດທະນາ. ເພື່ອເປັນການຄືນກໍາໄລແກ່ລູກຄ້າ ທີ່ຝາກເງິນ ໃນໂຄງການຝາກປະຈໍາ 4 ປີ ນໍາທະນາຄານຮ່ວມພັດທະນາ ໂດຍການມອບລົດ ໂຕໂຍຕາ ປຼາໂດ ນື່ງຄັນ ໃຫ້ຜູ້ໂຊກດີ ຊຶ່ງການມອບໂຊກຄັ້ງນີ້ ເປັນປີທີ່ 4, ໃຫ້ກຽດເຂົ້າຮ່ວມ ໂດຍທ່ານ ບຸນສະຫວ່າງ ພິລາໄຊພິທັກ ຜູ້ອໍານວຍການໃຫ່ຍທະນາຄານຮ່ວມພັດທະນາ ແລະ ຜູ້ບໍລິຫານລະດັບສູງ, ພະນັກງານວິຊາການທີ່ກ່ຽວຂ້ອງ ຕະຫຼອດຮອດລູກຄ້າ ແລະ ສື່ມວນຊົນ ເຂົ້າຮ່ວມເປັນສັກຂີພະຍານ, ຊຶ່ງພິທີດັງ່ກ່າວ, ໄດ້ຈັດຂຶ້ນໃນຄັ້ງນີ້ ວັນທີ 22 ມິຖຸນາຜ່ານມາ ທີ່ສູນການຄ້າ ວຽງຈັນເຊັນເຕີ ນະຄອນຫຼວງວຽງຈັນ .

ໃນໄລຍະຜ່ານມາ ທະນາຄານຮ່ວມພັດທະນາ ກໍ່ໄດ້ຄືນກໍາໄລ ໃຫ້ລູກຄ້າ ໃນໂຄງການຝາກປະຈໍາມີດັ່ງນີ້:
ປີ2016ໄດ້ແຈກລົດເກງເຊບໂລເລັກຈໍານວນ 1 ຄັນໃຫ້ລູກຄ້າຜູ້ໂຊກດີທີ່ຝາກປະຈໍາ 1 ປີ ນໍາທະນາຄານຮ່ວມພັດທະນາ,
ປີ 2017 ໄດ້ແຈກລົດ ກະບະ ເຊບໂລເລັກ ຈໍານວນ 1 ຄັນໃຫ້ລູກຄ້າ ທີ່ຝາກປະຈໍາ 2 ປີ ນໍາທະນາຄານຮ່ວມພັດນາ,
ປີ 2018 ໄດ້ແຈກລົດ ຈີບ ເຊບໂລເລັກ ຈໍານວນ 1 ຄັນໃຫ້ລູກຄ້າ ທີ່ຝາກປະຈໍາ 3 ປີ ນໍາທະນາຄານຮ່ວມພັດທະນາ,
ປີ 2019 ໄດ້ແຈກລົດ ໂຕໂຍຕາ ປຼາໂດ ຈໍານວນ 1 ຄັນ ໃຫ້ລູກຄ້າ ທີ່ຝາກປະຈໍາ 4 ປີນໍາທະນາຄານຮ່ວມພັດທະນາ.

ນອກຈາກນັ້ນ ຍັງໄດ້ຈັບລາງວັນມອບໂຊກ ໃຫ້ລູກຄ້າທີ່ມາຮ່ວມງານຄື: 1. ຈາກທະນາຄານຮ່ວມພັດທະນາ ແລະ ບໍລິສັດ ວຽງຈັນປະກັນໄພ, ໄດ້ຮັບປະກັນໄພ ອຸປະຕິເຫດ 19 ລາງວັນ ລວມມູນຄ່າ 1,6 ລ້ານກີບ, 2. ຈັບລາງວັນ ລູກຄ້າ ທີ່ຊໍາລະຄ່າສິນຄ້າ ຜ່ານເຄື່ອງ QR ລົດເບຍລາວ, ມູນຄ່າ 2 ລ້ານກີບ, 3. ຈັບລາງວັນ Promotion ບັດ UPI, ມອບປີ້ເຂົ້າຊົມການແຂ່ງຂັນກິລາ ບານເຕະ ພ້ອມປີ້ຍົນ ແລະ ທີ່ພັກ ທີ່ປະເທດສິງກະໂປ ໃຫ້ລູກຄ້າ ທີ່ໃຊ້ບັດ ຢູ່ນຽນເພ, 4. ຈັບລາງວັນ Promotion MoneyGram ແຈກໂທລະສັບ ມືຖື ທຸກໆ ເດືອນ ລວມ 7 ເຄື່ອງ ໃຫ້ລູກຄ້າຜູ້ໂຊກດີ.