ລາວ-ຫວຽດນາມ ເຊັນສັນຍາ ຊື້-ຂາຍ ໄຟຟ້າ ຈາກເຂື່ອນໄຟຟ້ານ້ຳຊຳ 3 ຮ່ວມກັນ

ໃນລະຫວ່າງການຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານຮອງນາຍົກລັດຖະມົນຕີ ແຫ່ງ ສສ ຫວຽດນາມພ້ອມດ້ວຍ ຄະນະໃນມື້ນີ້ 24/06/2019 ໄດ້ມີການເຊັນສັນຍາ ຊື້-ຂາຍ ໄຟຟ້າ ຈາກເຂື່ອນໄຟຟ້ານ້ຳຊຳ 3 ລະຫວ່າງ ບໍລິສັດ ພົງຊັບທະວີ ຂອງລາວ ກັບ ລັດວິສາຫະກິດໄຟຟ້າ ຫວຽດນາມ. ໂດຍຕອບສະໜອງຕາມຄຳເຊີນຂອງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ຈິງ ດິງ ຢຸງ, ຮອງນາຍົກລັດຖະມົນຕີ ແຫ່ງ ສສ. ຫວຽດນາມ ພ້ອມດ້ວຍຄະນະ ໄດ້ເດີນທາງມາຢ້ຽມ ຢາມເຮັດວຽກຢູ່ ສປປ ລາວ, ໃນລະຫວ່າງວັນທີ 24-25/06/2019, ເພື່ອເສີມຂະຫຍາຍສາຍພົວ ພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບຈະເລີນ ງອກງາມຍິ່ງໆຂຶ້ນ.

ທ່ານ ສອນໄຊ ສີພັນດອນ ໄດ້ໃຫ້ກຽດຕ້ອນຮັບ ແລະ ພົບປະສອງຝ່າຍກັບ ທ່ານ ຈິງ ດິງ ຢຸງ ທີ່ ຫໍປະຊຸມແຫ່ງຊາດ ໂດຍໄດ້ມີກອງປະຊຸມ ພົບປະທັງສອງຝ່າຍ ເຊິ່ງດຳເນີນໄປດ້ວຍບັນຍາກາດອັນອົບອຸ່ນ, ໄມຕີຈິດມິດຕະພາບ ແລະ ຄວາມສາມັກຄີຮັກແພງອັນສະໜິດສະໜົມ. ໃນໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ, ຊຶ່ງເປັນການປະກອບສ່ວນອັນສຳຄັນ ເຂົ້າໃນການເພີ່ມທະວີ ແລະ ເສີມຂະຫຍາຍມູນເຊື້ອອັນດີງາມແຫ່ງສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ທີ່ມີມາແຕ່ດົນ ນານແລ້ວນັ້ນໃຫ້ມີຄວາມແໜ້ນແຟ້ນ ແລະ ມີປະສິດທິຜົນສູງຂຶ້ນກວ່າເກົ່າ.

ບາງເນື້ອໃນສຳຄັນໃນກອງປະຊຸມພົບປະໄດ້ກວ່າເຖິງມູນຄ່າການຄ້າຂອງສອງຝ່າຍ ເພີ່ມ 13,24% ໃນ 5 ເດືອນຕົ້ນປີ 2019 ແລະ ຊຸກຍູ້ໃຫ້ມີການ ຮ່ວມມືກັນຫຼາຍຂຶ້ນດ້ານພະລັງງານໄຟຟ້າ ເພື່ອໃຫ້ສາມາດບັນລຸໄດ້ຕາມເປົ້າໝາຍ, ຊຶ່ງໃນປີ 2018 ຜ່ານມາ ການຄ້າສອງຝ່າຍສາມາດ ບັນລຸໄດ້ 1 ຕື້ໂດລາ ສະຫະລັດ. ພ້ອມນີ້, ສສ ຫວຽດນາມ ຍັງເປັນປະເທດ ທີ່ຈັດຢູ່ໃນອັນດັບ 3 ຂອງການລົງທຶນຕ່າງ ປະເທດຢູ່ ສປປ ລາວ, ຊຶ່ງນັບແຕ່ປີ 1989 ເປັນຕົ້ນມາ ມີທັງໝົດ 413 ໂຄງການ, ມູນຄ່າອະນຸມັດທັງໝົດຫຼາຍກວ່າ 4,1 ຕື້ໂດລາສະຫະລັດ.

ໃນປີ 2019, ສສ ຫວຽດນາມ ໄດ້ສືບຕໍ່ໃຫ້ການຊ່ວຍເຫຼືອແກ່ ສປປ ລາວ ຊຶ່ງແຜນປະຈຳປີ 2019 ແມ່ນ 711 ຕື້ດົ່ງ, ຊຶ່ງໄດ້ຖືກນຳໃຊ້ເຂົ້າໃນການຈັດຕັ້ງປະຕິບັດວຽກງານໃນບັນດາໂຄງການຕ່າງໆຢ່າງມີຈຸດສຸມ, ຮັບປະກັນຄຸນນະພາບ ແລະ ມີຄວາມຄືບໜ້າ. ປະຈຸບັນ ໂຄງການປຸກສ້າງຫໍສະພາແຫ່ງຊາດ ລາວ ຫຼັງໃໝ່ ມູນຄ່າ 111,75 ລ້ານໂດລາສະ ຫະລັດ ແມ່ນມີຄວາມຄືບໜ້າໄປເລື້ອຍໆ, ໂຄງການກໍ່ສ້າງໂຮງໝໍແຂວງຊຽງຂວາງ ແລະ ໂຮງໝໍແຂວງຫົວພັນ ຄາດວ່າຈະສຳເລັດ ໄປຕາມແຜນທີ່ກຳນົດ. ສຳລັບໂຄງການກໍ່ສ້າງສະໜາມບິນໜອງຄ້າງ ແມ່ນສຳເລັດແລ້ວປະມານ 75% ແລະ ສະເໜີສືບຕໍ່ຊຸກຍູ້ໃຫ້ສຳເລັດຕາມກຳນົດເວລາ. ນອກຈາກນີ້, ສອງຝ່າຍ ຍັງໄດ້ລາຍງານສະພາບ ການພັດທະນາເສດຖະກິດ-ສັງຄົມ ໂດຍລວມຂອງສອງຝ່າຍ ໃຫ້ກັນຊາບ.

ພາຍຫຼັງສຳເລັດພິທີພົບປະ, ສອງທ່ານຮອງ ນາຍົກລັດຖະມົນຕີ ລາວ ແລະ ຫວຽດນມ ກໍ່ໄດ້ເຂົ້າຮ່ວມເປັນສັກຂີພິຍານໃນພິທີເຊັນສັນ ຍາ ຊື້-ຂາຍ ໄຟຟ້າ ເຂື່ອນໄຟຟ້ານ້ຳຊຳ 3 ລະຫວ່າງ ບໍລິສັດ ພົງຊັບທະວີ ຂອງລາວ ກັບ ລັດວິສາຫະກິດໄຟຟ້າ ຫວຽດນາມ. ໃນຕອນບ່າຍຂອງວັນດຽວກັນ, ທ່ານ ຈິງ ດິງ ຢຸງ ພ້ອມດ້ວຍຄະນະ ຍັງໄດ້ພົບປະເຮັດ ວຽກຮ່ວມກັບ ທ່ານ ສົມພັນ ແພງຄຳມີ, ຮອງປະທານສະພາແຫ່ງຊາດ ແຫ່ງ ສປປ ລາວ, ທັງເປັນຫົວໜ້າຄະນະຊີ້ນຳໂຄງການປຸກສ້າງຫໍ ສະພາແຫ່ງຊາດລາວ ຫຼັງໃໝ່. ພາຍຫຼັງສຳເລັດພິທີພົບປະ ກໍໄດ້ມີພິທີເຊັນ ບົດບັນທຶກການພົບປະເຮັດວຽກຮ່ວມກັນ.

ຂ່າວ: ສຸກນີລັນດອນ
ພາບ: ສນຍ