ປະຫວັດຄວາມເປັນມາຂອງ ພະທາດສີໂຄດຕະບອງ ຫລື ສີໂຄດຕະບູນ

ພະທາດສີໂຄດຕະບອງ ຫລື ສີໂຄດຕະບູນ ຕັ້ງຢູ່ເທສະບານເມືອງທ່າແຂກ (ປະຈຸບັນ) ເປັນພະທາດທີ່ສ້າງຂື້ນສະໄໝອານາຈັກສີໂຄດຕະບອງ ໃນສັດຕະວັດ VI ສະໄໝ ພຣະເຈົ້າສຸມິນທະຣາດເພື່ອສະເຫລີມສະຫລອງພຣະກຽດພຣະຍາສີໂຄດຕະບອງ ໂດຍສ້າງອຸບມົງ (ພຮະທາດສີໂຄດຕະບອງ)ກວມຮອຍພຮະບາດ (ຮອຍຕີນ) ຂອງພຮະພຸດທະເຈົ້າ ຄັ້ງຍັງມີພຮະງົບຫູ່

ພຮະອົງໄດ້ສະເດັດມາຈາກ ພູກໍາພ້າ ມາປະທັບ ຢູ່ທີ່ນີ້ກ່ອນສະເດັດໄປພັກຜ່ອນ ຢູ່ຕົ້ນຮັງ ແລະ ໄດ້ເອົາພຣະສາຮິຄະທາດ ຂອງພຣະຍາສີໂຄດຕະບອງ ບັນຈຸໄວ້ໃນອົງພຣະທາດ (ປະຫວັດສາດແຂວງຄໍາມ່ວນ2015ໜ້າ14);

ຜ່ານຂະບວນວິວັດແຫ່ງປົກຄອງຂອງບັນດາພຣະຍາຢູ່ບັນດານະຄອນຕ່າງໆ ທີ່ປະກົດໃນຕຳນານ ແລະ ການຄົ້ນພົບຂອງນັກບູຮານຄະດີຢູ່ ເຂດບ້ານໜອງເຮືອທອງ ແຄມຝັ່ງເຊບັ້ງໄຟພົບເຫັນຫລັກຖານ: ເສົາຫີນເປັນຮູບສີວະລິງຄະປະເພດ 8 ຫລ່ຽມຈໍານວນ 3 ເສົາ, ຫີນແກະສະຫລັກຮູບສາມຫລ່ຽມ, ຂ້າງໃນເປັນຮູບບູຊາໃນສາສະໜາພາມສະໄໝຕົ້ນສີໂຄດຕະບອງ, ຮ່ອງຮອຍກະຕຶບພົບເຫັນຫີນສາມຊະນິດຄື :

ຫີນຕັດ, ດິນຈີ່ ແລະ ຫີນເຂົ້າຈີ່ຢ່າງຫລວງຫລາຍ, ໝໍ້ໃສ່ກະດູກ ແລະ ເຄື່ອງໃຊ້ຄົນບູຮານຈໍານວນໜຶ່ງ,ໜອງເຮືອທອງທີ່ຄົນທ້ອງຖິ່ນເຊື່ອວ່າເປັນໜອງສັກສິດ, ສະນັ້ນນັກຄົ້ນຄ້ວາທັງຫລາຍຈື່ງສັນນິຖານວ່າ: ເປັນເຂດໃຈກາງຂອງອານາຈັກສີໂຄດຕະບອງທີ່ເປັນໜື່ງໃນ 9 ອານາຈັກຢູ່ສຸວັນນະພູມແຫ່ງນີ້ຄື:

  1. ອານາຈັກທະວາຣະວະດີ (ພວກມອນ)
  2. ອານາຈັກຫະຣິພູນໄຊ (ເຂດລຳພູມພວກມອນ)
  3. ອານາຈັກທະຕອນ (ພວກມອນ)
  4. ອານາຈັກໂຄດຕະບູນ (ລາວ-ເຈນລະບົກ)
  5. ອານາຈັກເຈນລະນ້ຳ (ຂອມ)
  6. ອານາຈັກຈາມປາ (ພວກຈາມ)
  7. ອານາຈັກດາຍຫວຽດ (ຫວຽດນາມ)
  8. ອານາຈັກປິວ ຫລື ປະຢູ (ມຽນມາ) ແລະ
  9. ອານາຈັກສີວິໄຊ (ຈັງຫວັດສະຕູນພາກໄຕ້ຂອງໄທ)
Facebook Comments