ຊຽງຂວາງເກມ ສິ່ງທີ່ປະຊາຊົນຍັງຄອງຄອຍຢາກຮູ້ຄຳຕອບ

ງານມະຫາກຳກິລາແຫ່ງຊາດ ຄັ້ງທີ XI ຫຼື “ຊຽງຂວາງ ເກມ” ຖືກເລື່ອນມາຫຼາຍຄັ້ງຕິດຕໍ່ກັນກ່ອນຈະຖືກໂຈະໂດຍອັດຕະໂນມັດຍ້ອນການລະບາດຂອງພະຍາດໂຄວິດ19 ເຮັດໃຫ້ຫຼາຍຄົນສົນໃຈຢາກຮູ້ຄຳຕອບວ່າຕົກລົງ ຈະເດີນໜ້າໄປຕໍ່ ຫຼື ພໍສໍ່ານີ້ ໂດຍສະເພາະແມ່ນຊາວຄ້າຂາຍທີ່ໄດ້ລົງທຶນລົງຮອນ ໄດ້ຈ່າຍເງິນຈັບຈອງສະຖານທີ່ໄປແລ້ວ ເຊິ່ງຄາດວ່າຈະໄດ້ຮູ້ຄຳຕອບໃນໄວໆນີ້!

“ຊຽງຂວາງເກມ” ເບື້ອງຕົ້ນຈະເປີດການແຂ່ງຂັນ ໃນລະຫວ່າງວັນທີ 22 ມີນາ ຫາ 1 ເມສາ 2020 ຜ່ານມານີ້ ແຕ່ເຫດການຕ້ອງຖືກຢຸດສະງັກເນື່ອງຈາກການລະບາດຂອງພະຍາດໂຄວິດ-19 ທີ່ທົ່ວໂລກກຳລັງຜະເຊີນຢູ່ ລວມທັງສປປ ລາວ ເຮົາຈຶ່ງໄດ້ມີການປະກາດຢຸດການແຂ່ງຂັນໄປແບບບໍ່ມີກຳນົດ.

ແນວໃດກໍ່ຕາມທຸກຄຳຖາມໃນໃຈຂອງປະຊາຊົນທີ່ຄອງຄອຍງານສຳຄັນດັ່ງກ່າວຄາດວ່າ ພາກລັດຈະມີຄຳຕອບໃຫ້ ໃນທ້າຍເດືອນມິຖຸນາທີ່ຈະເຖິງນີ້ ຫາກໄດ້ເປີດກອງປະຊຸມລະດັບຊາດ ເພື່ອຄົ້ນຄວ້າຄວາມເປັນໄປໄດ້ໃນການກຳນົດ ງານກິລາ “ຊຽງຂວາງ ເກມ”ອີກຄັ້ງໜຶ່ງ.

ທ່ານ ທອງຜິວ ສີປັນຍາ ຮອງຫົວໜ້າພະແນກສຶກສາທິການ ແລະ ກິລາ ແຂວງຊຽງຂວາງ ຍັງແຈ້ງໃຫ້ຊາບອີກວ່າ: ຫຼັງຈາກສະຖານະການພະຍາດໂຄວິດ-19 ໄດ້ຜ່ອນຄາຍລົງ ສະພາບການເຄື່ອນໄຫວໃນແຂວງຊຽງຂວາງ ກໍເລີ່ມກັບມາມີສີສັນ ແລະ ສະພາບກໍກັບເຂົ້າສູ່ພາວະປົກກະຕິຄືເກົ່າ ພ້ອມທັງປະຕິບັດຕາມຄຳສັ່ງ ແລະ ແຈ້ງການ ຈາກລັດຖະບານ ອະນຸຍາດໃຫ້ບາງປະເພດກິລາກາງແຈ້ງ ແລະ ບໍ່ມີມວນຊົນແອອັດຫຼາຍ ໃຫ້ດຳເນີນຫຼິ້ນກິລາໄດ້ ສ່ວນກິລາທີ່ຫ້າມຫຼິ້ນສ່ວນໃຫຍ່ແມ່ນກິລາໃນຮົ່ມ.

ສ່ວນສະພາບສະໜາມກິລາ ທີ່ກຽມຮອງຮັບຈັດງານແຂ່ງຂັນ ງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ ທາງຄະນະຮັບຜິດຊອບພາກສະໜາມ ກໍໄດ້ມີການກວດກາຢ່າງເປັນປະຈຳ ທຸກສະໜາມກໍຍັງສົມບູນແບບຄືເກົ່າ ໂດຍສະເພາະສະໜາມທີ່ຈະນຳໃຊ້ເຂົ້າໃນພິທີເປີດ-ປິດ ຊຽງຂວາງ ເກມ ປັດຈຸບັນກໍມີຫຍ້າຂຶ້ນຂຽວງາມ ແລະ ພ້ອມທີ່ຈະຈັດການແຂ່ງຂັນຕະຫຼອດເວລາ.​

ຮອງຫົວໜ້າພະແນກສຶກສາທິການ ແລະ ກິລາ ແຂວງຊຽງຂວາງ ແຈ້ງຕື່ມອີກວ່າ: ສຳລັບສະພາບຄວາມພ້ອມຂອງນັກກິລາແຂວງຊຽງຂວາງ ຊຸດກຽມຮ່ວມລ່າຫຼຽນຄຳ ງານກິລາແຫ່ງຊາດ ຈຳນວນ 755 ຄົນ, ຍິງ 74 ຄົນ ແລະ ຄູຝຶກ 89 ຄົນ ກໍໄດ້ຕິດຕາມ ແລະ ໃຫ້ເຂົາເຈົ້າເຄື່ອນໄຫວຢ່າງເປັນປົກກະຕິ ເພື່ອຮັກສາສະມັດຖະພາບການຫຼິ້ນກິລາຢ່າງສະໝໍ່າສະເໝີ ໂດຍສະເພາະກິລາແລ່ນ-ລານ, ເທຄວັນໂດ ແລະ ເປຕັງ ເຂົາເຈົ້າເກັບຕົວຝຶກຊ້ອມ ແລະ ຍັງຮັກສາມາດຕະຖານ ແລະ ສະຖິຕິຢູ່ຄົງເດີມຢ່າງໜ້ຽວແໜ້ນ.

ສ່ວນການຈັດແຂ່ງຂັນງານກິລາແຫ່ງຊາດ ໃນມື້ໃດ, ເດືອນໃດ ແລະ ປີໃດນັ້ນ ທາງແຂວງພວກເຮົາ ໄດ້ມີການປະສານພົວພັນກັບການນຳຂັ້ນສູນກາງ ໂດຍສະເພາະກະຊວງສຶກສາທິການ ແລະ ກິລາ ຄາດວ່າ ທ້າຍເດືອນມິຖຸນານີ້ ຈະໄດ້ມີກອງປະຊຸມໃຫຍ່ລະດັບຊາດ ເພື່ອຈະຄົ້ນຄວ້າ ແລະ ປືກສາຫາລືຄວາມເປັນໄປໄດ້ ເພື່ອກຳນົດຈະຈັດການແຂ່ງຂັນໃນໄລຍະໃດ ເພື່ອໃຫ້ແທດເໝາະກັບສະພາບຄວາມເປັນຈິງ ທັງນີ້ ທັງນັ້ນ ກໍເພື່ອເປັນການຮັບປະກັນກັບການຕ້ານເຊື້ອພະຍາດ ໂຄວິດ-19 ຫາຍໄປຈາກສປປ ລາວ ຂອງພວກເຮົາ.

ຂ່າວໂດຍ: ສົງການຈາກເກາະຕິດວົງການກິລາລາວ