ດ່ວນ ! ຢືນຢັນ ຊຽງຂວາງ ເກມ ຈະເລື່ອນໄປແບບບໍ່ມີກຳນົດ.

ທ່ານນາງ ແສງເດືອນ ຫຼ້າຈັນທະບູນ, ລັດຖະມົນຕີ ກະຊວງສຶກສາທິການ ແລະ ກິລາ, ອອກມາຢືນຢັນເມື່ອບໍ່ເທົ່າໃດຊົ່ວໂມງຜ່ານມານີ້ ວ່າ ລັດຖະບານ ເປັນເອກະພາບເຫັນດີໃຫ້ເລື່ອນ “ຊຽງຂວາງ ເກມ” ອອກໄປແບບບໍ່ມີກຳນົດ ເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ຍັງໜ້າເປັນຫ່ວງ!

ທ່ານລັດຖະມົນຕີກະຊວງ ສສກ ໄດ້ໃຫ້ສຳພາດສື່ມວນຊົນສາຍກິລາ ມື້ເຊົ້ານີ້ (29 ກຸມພາ) ໃນກອງປະຊຸມສະໄໝວິສາມັນຂອງສະຫະພັນບານເຕະແຫ່ງຊາດລາວ ທີ່ໂຮງແຮມແລນມາກ ໂດຍທ່ານໄດ້ຢືນຢັນວ່າ “ຄະນະຮັບຜິດຊອບຈັດງານ ໄດ້ຄົ້ນຄວ້າກັນແລ້ວ ເຫັນວ່າສະພາບການລະບາດຂອງພະຍາດ ໂຄວິດ -19 ຍັງມີຄວາມຮຸນແຮງ ແລະ ຄວາມສ່ຽງຫຼາຍ ຕາມການແນະນຳຂອງ ກະຊວງສາທາລະນະສຸກ ກໍຄືຄະນະຮັບຜິດຊອບສະເພາະກິດ ກ່ຽວກັບການແກ້ໄຂພະຍາດໂຄວີດ -19 ທີ່ເຫັນວ່າ ທົ່ວໂລກກຳລັງປະສົບວິກິດດັ່ງກ່າວຢ່າງໜັກ!”.

ແນວໃດກໍຕາມ, ທ່ານລັດຖະມົນຕີ ກໍໄດ້ສະແດງຄວາມເຫັນໃຈຕໍ່ຄະນະກະກຽມຈັດງານກິລາແຫ່ງຊາດ ລວມທັງຄະນະຮັບຜິດຊອບທີມ ແລະ ນັກກິລາ ແຕ່ລະພາກສ່ວນ ທີ່ກຳລັງຫ້າງຫາກະກຽມເພື່ອເຂົ້າຮ່ວມ ແລະ ລວມໄປທັງນັກທຸລະກິດ ບໍລິສັດຫ້າງຮ້ານຕ່າງໆທີ່ໄດ້ທຸ້ມເທ ແລະ ປະກອບສ່ວນທຶນຮອນ ງົບປະມານເຂົ້າໃສ່ເປັນຈຳນວນຫຼວງຫຼາຍ ເຊິ່ງພວກເຮົາຈະໄດ້ຈັດກອງປະຊຸມ ເພື່ອຄົ້ນຄວ້າຫາທາງອອກນຳກັນ.

ຕອນທ້າຍ, ທ່ານລັດຖະມົນຕີ ສສກ ຍັງໄດ້ເວົ້າເຖິງມາດຕາການຕ່າງໆໃນການເຝົ້າຕິດຕາມ ແລະ ປ້ອງກັນການແຜ່ລະບາດຂອງພະຍາດດັ່ງກ່າວ ໃນຂົງ ເຂດການສຶກສາ ເຊິ່ງກະຊວງ ສສກ ກໍກຽມພ້ອມຈະປະຕິບັດຕາມການແນະນຳ ຫຼື ແຈ້ງການຂອງກະຊວງກ່ຽວຂ້ອງ ກໍຄືກະຊວງສາທາ ໃນການທີ່ຈະປະຕິບັດຕໍ່ຂົງເຂດການສຶກສາ.

ແນວໃດກໍຕາມ, ທ່ານລັດຖະມົນຕີເນັ້ນໜັກວ່າ ສຳລັບແຈ້ງການຢ່າງເປັນທາງການ ຈະອອກມາໃນໄວໆນີ້.

ໂດຍ: ຄົນຂ້າງສະໜາມ

ພາບ: ອ້ວນດຳ (ນສພ ສຶກສາ-ກິລາ)