ເມືອງບໍ່ແຕນ ໄຂກອງປະຊຸມອົງການປົກຄອງປະຈໍາ 6 ເດືອນຕົ້ນປີ

ກອງປະຊຸມອົງການປົກຄອງ ເມືອງບໍ່ແຕນ ແຂວງໄຊຍະບູລີ ປະຈໍາ 6 ເດືອນຕົ້ນປີ 2019 ໄດ້ໄຂຂຶ້ນໃນວັນທີ 4 ກັນຍາ 2019 ໂດຍມີ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ການນໍາຂອງແຂວງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ແລະ ນາຍບ້ານ ທົ່ວເມືອງເຂົ້າຮ່ວມ ເຊິ່ງກອງປະຊຸມ ຜ່ານຮ່າງບົດສະຫລຸບການຈັດຕັ້ງປະຕິບັດ ວຽກງານອົງການປົກຄອງໃນ 6 ເດືອນ ແລະ ທິດທາງແຜນການ 6 ເດືອນທ້າຍປີ 2019, ພ້ອມທັງໄດ້ມີການປະກອບຄຳຄິດຄຳເຫັນໂດຍໄດ້ລົງເລິກວຽກງານເສດຖະກິດ, ວັດທະນະທໍາ-ສັງຄົມ, ຊອກໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງທີ່ຈະຕ້ອງໄດ້ແກ້ໄຂໃນຕໍ່ໜ້າ.
ພ້ອມນີ້ ກອງປະຊຸມຍັງຈະໄດ້ຮັບຟັງ ແລະ ປະກອບຄໍາຄິດ-ຄໍາເຫັນຕໍ່ວຽກງານການຈັດຕັ້ງປະຕິບັດແຜນລາຍຮັບ-ລາຍຈ່າຍ,

ການຊຸກຍູ້ການຜະລິດລະດູປີ, ການປະຕິບັດແຜນຕ້ານແລ້ງ-ຕ້ານຖ້ວມ, ການຊຸກຍູ້ປະຕິບັດໂຄງການກໍ່ສ້າງນໍ້າປະປາ, ການກໍ່ສ້າງຂົວຂ້າມນໍ້າ, ການສ້ອງແປງທາງສຸກເສີນ, ສະພາບການໄຂສົກຮຽນໃໝ່, ວິທີການປ້ອງກັນ ແລະ ແກ້ໄຂບັນຫາປະກົດການຫຍໍ້ທໍ້ທີ່ອາດຈະເກີດຂຶ້ນຢູ່ບັນດາໂຮງຮຽນ, ການສົ່ງເສີມສຸຂະພາບ ແລະ ການບໍລິການປິ່ນປົວຄົນເຈັບ ຢູ່ໂຮງໝໍຊຸມຊົນ, ໂຮງໝໍນ້ອຍ ຕິດພັນກັບການປ້ອງກັນ ແລະ ຕອບໂຕ້ພະຍາດໄຂ້ຍຸງລາຍ, ການແກ້ໄຂປະກົດການຫຍໍ້ທໍ້ໃນສັງຄົມ ແລະ ບັນຫາສຳຄັນອື່ນໆ.
ໂດຍ: ອຸ່ນເຮືອນ ໂພທິລັກ