ເລື່ອງເລົ່າ ຕຳນານ ໜອງຕັ່ງເມືອງສູຍ

ເພີ່ນວ່າ ໜອງຕັ່ງນີ້.​ ມີຊື່ລືຊາ
ບູຮານຈາ.​ ແຕ່ດົນນານແລ້ວ
ແນວນາມເຊື້ອ.​ ບູຮານລາວແຕ່ງ
ແຂກຕ່າງດ້າວ.​ ມາຫຼີ້ນທ່ຽວຊົມ

ໜອງຕັ່ງເປັນໜອງນ້ຳຈືມທີ່ມີຂະໜາດໃຫຍ່ພໍສົມຄວນ ຕັ້ງຢູ່ບ້ານໜອງຕັ່ງເຂດເມືອງສູຍ ເມື່ອກ່ອນໜອງຕັ່ງເປັນແຫ່ຼງທ່ອງທ່ຽວທີ່ມີຊື່ສຽງ ມີທິວທັດທຳມະຊາດອັນອຸດົມສົມບູນ ເປັນແຫ່ຼງອາຫານຂອງປະຊາຊົນໃນເຂດອ້ອມຂ້າງ ທັງຫາປູຫາປາ ເຮັດສວນປູກຜັກ ໜອງຕັ່ງຈະເປັນໜອງຍາວແລະກ້ວາງ ໜື່ງສ່ວນສາມຈະເປັນເສັ້ນທາງອ້ອມ ອີກສ່ວນເປັນຜາສູງຊັນຕັ້ງສະຫງ່າສາມາດຂື້ນໄປຊົມທິວທັດເມືອງສູຍໄດ້ຢ່າງສວຍງາມ ມີຕົ້ນໄມ້ທີ່ຂຽວກະຈີ ໃນລະດູໜາວຈະມີໝອກປົກຄຸມມີ

ບາງຄັ້ງຈະເຫັນຝູງນົກຍາງບີນກາຍມ່ານໝອກຢ່າງສວຍງາມ ອີກຢ່າງໝອງຕັ່ງຍັງເປັນສູນລວມປະຊາຊົນຊາວເມືອງສູຍ ເພາະພີ່ນ້ອງເຂດນີ້ຈະມາຮ່ວມກັນສະຫຼອງບຸນເຊັ່ນ ປີໃໝ່ລາວ,​ ບຸນເຂົ້າແລະອອກພັນສາ.​

ໜອງຕັ່ງນັ້ນມີຕຳນານເລົ່າຂານກັນມານານນັບພັນປີ ບໍ່ຮູ້ວ່າເລື່ອງລາວເຫຼົ່ານີ້ໄດ້ຖືກຳເນີດມາແຕ່ສະໄໝປາງໃດ ແຕ່ມັນຖືກຖ່າຍທອດຈາກປາກສູ່ປາກຈົນມາເຖີງທຸກວັນນີ້.​ ຂ້າພະເຈົ້າຂໍເປັນອີກໜື່ງກະບອກສຽງທີ່ຈະນຳເອົາເລື່ອງລາວຂອງບ້ານເກີດເມືອງນອນມາເລົ່າກ່າວຂານ ຫາກມີສ່ວນໃດຜິດພາດ ກະຂໍໂທດຂໍອາໄພມາຍັງທີ່ນີ້ ຖ້າທ່ານໃດມີຂໍ້ມູນເພີ່ມເຕີມເພື່ອໃຫ້ເນື້ອໃນສົມບູນຖືກຕາມຄຳເລົ່າຂານຂ້າພະເຈົ້າຫຍີນດີຮັບຟັງ ກະລຸນາແຈ້ງຄວາມຄິດເຫັນຂອງທ່ານມາຍັງເຜຮດໂດຍກົງ ຂໍຂອບໃຈ.

ປາງກ່ອນມີບ້ານນ້ອຍແຫ່ງໜື່ງຕັ້ງຢູ່ບໍລິເວນໃກ້ກັບໜ້າຜາ ຍ້ອນສະຖານທີ່ຕັ້ງປະຊາຊົນຈື່ງເອີ້ນບ້ານນ້ອຍແຫ່ງນີ້ວ່າບ້ານຜາຕັ້ງ ເຊີ່ງມີປະຊາຊົນອາໄສຢູ່ປະມານສິບກ່ວາຫຼັງຄາເຮືອນ ປະຊາຊົນເຂດນີ້ມີອາຊີບເຮັດໄຮ່ໄຖນາ ປູກຜັກປູກເຍື້ອຫາເຄື່ອງປ່າຂອງດົງລ້ຽງຊີບ ເປັນບ້ານທີ່ມີຄວາມສະຫງົບ ປະຊາຊົນໃນໝູ່ບ້ານກະມີຄວາມສາມັກຄີຮັກແພງເຊີ່ງກັນແລະກັນ ທຸກຄອບຄົວລ້ວນແຕ່ຖ້ອຍທີຖ້ອຍອາໄສເຊີ່ງກັນແລະກັນ ຜູ້ທີ່ປົກຄອງນຳພາປະຊາຊົນໃນບ້ານຜາຕັ້ງນີ້ທີ່ເປັນເຈົ້າກົກເຈົ້າເຫຼົ່າມີຊື່ວ່າ ອາຍາພັນ ທີ່ເປັນຄົນມີອຳນາດການຕັດສີນໃຈ.​

ອາຍາພັນນັ້ນມີລູກສາວຄົນໜື່ງຊື່ວ່ານາງສີດາ ເຊີ່ງນາງສີດາເປັນຍີງສາວທີ່ມີຮູບຮ່າງສວຍງາມລາວກັບໃບໂຍກ ດວງຕາທັງສອງຂອງນາງໃສແວວວາວເໜືອດັ່ງເພັດມະນີ ມີຜິວຂາວລຽບນຽນ ຜົນດຳຍາວເປັນເງົາມີກີ່ນຫອມທີ່ຊວນໃຫ້ໄຫຼຫົຼງ ສອງແກ້ມມີສີຊົມພູອ່ອງຕ່ອງຄ້າຍດັງດອກກຸຫຼາບ

ແຂວນຍາວນີ້ວມືງາມມີເລັບທີ່ຂາວຜຸດຜ່ອງ ຮ່າງຄີງກົມໜ້າອົກສີໂນນໆຄ້າຍດັ່ງນາງເທບໃນບົດກະວີ ທັງວາຈາກິລິຍາມາລະຍາດທຸກສີ່ງລ້ວນແຕ່ມີວາດມີຊົງ ຍາມຍີ້ມຊວນໃຫ້ຊາຍທີ່ມາພົບເຫັນເກືອບຫົວໃຈວາຍຕາຍຍ້ອນຄວາມງາມຂອງນາງ ຍ້ອນຄວາມງາມທີ່ໂດດເດັ່ນຂອງນາງສີດາຈື່ງມີຊາຍມາກໜ້າຫຼາຍຕາແວະວຽນມາຕ່າງກໍ່ຢາກເຊີຍຊົມ ຜີວກາຍທີ່ໃສ່ຜຸດຜ່ອງ ແລະຢາກໄດ້ນາງໄປເປັນສີພັນລະຍາເປັນແມ່ສີເຮືອນ.

ແຕ່ວ່າພວກໜຸ່ນໆທັງຫຼາຍຕ້ອງຜິດຫວັງໄປຕາມໆກັນເພາະວ່ານາງນ້ອງສີດາມີຄູ່ໜັ້ນໝາຍແລ້ວ ກ່າວເຖີງຄົນທີ່ເປັນຄູ່ໜັ້ນຂອງນາງນັ້ນ ມີນາມວ່າຈັນທາ ເປັນລູກຊາຍຂອງເສດຖີພໍ່ຄ້າຊາວຊຽງແດດ ຈັນທາຖືວ່າເປັນຊາຍໝຸ່ມທີ່ມີຮູບຮ່າງແຂງແກ່ນໜ້າຕາດີ ມີຄວາມຮູ້ຄວາມສາມາດທັງດ້ານການຄ້າຂາຍທີ່ໄດ້ມາຈາກຜູ້ເປັນບິດາ ອີກຢ່າງຈັນທາຍັງມີຄວາມສາມາດໃນການຕໍ່ສູ້ໂດຍສະເພາະການຕໍ່ສູ້ເທີງຫຼັງມ້າ ຄອບຄົວຂອງຈັນທາມີການຄ້າຂາຍກັບຕ່າງເມືອງເຊັ່ນເມືອງວຽງຈັນ,​ເມືອງພວນ, ເມືອງຊຽງທອງ….

ສີນຄ້າທີ່ນຳໄປຂາຍສ່ວນຫຼາຍກະເປັນພວກຄັ່ງ,​ຍານ,​ເຄື່ອງປ່າຂອງດົງ,​ສັດປ່າ…​ຈື່ງເຮັດໃຫ້ຄອບຄົວມີຄວາມມັ່ງຄັ່ງຮັ່ງມີ ຈັນທາມີມ້າຄູ່ໃຈຢູ່ໜື່ງໂຕ ເປັນມ້າຂາວເຜືອກມັນມີຮູບຮ່າງໃຫຍ່ມີດວງດາສີແດງຊົງພະລັງ ມັນສາມາດກະໂດດແລະແລ່ນໄດ້ໄວກ່ວາມ້າປົກກະຕິ ຈັນທາມັກຈະພາມັນມາຫາສີດາເປັນປະຈຳ ແລະເຂົາກະພາສີດາຂີ່ຫັຼງມ້າເລາະກີນຫຍ້າ ພ້ອມທັງເວົ້າຈາພາສາເລື່ອງຄວາມຮັກຈົນທັງສາມມີຄວາມລື້ງເຄີຍສະນິດສະໜົມກັນເປັນຢ່າງດີ.

ທີ່ບ້ານຜາຕັ້ງ ການດຳລົງຊີວິດຂອງປະຊາຊົນຍັງຄົງເປັນໄປຢ່າງປົກກະຕິ ຕ່າງແຕ່ວັນນີ້ເປັນວັນສີນປະຊາຊົນໃນເຂດບ້ານຈື່ງພາກັນຢຸດວຽກງານ ເພື່ອເປັນການຖືສີນ ໃນວັນພະແມ່ນບໍ່ໃຫ້ຜູ້ໃດອອກແຮງງານຫຼືຂ້າສັດຕັດຊີວິດ ເພາະມັນຈະເກີດເຫດບໍ່ດີມີເຄາະມີກຳຕໍ່ການດຳລົງຊີວິດຂອງຕົນແລະບ້ານເມືອງ ກົດນີ້ເຄີຍປະຕິບັດກັນມາແຕ່ບູຮານນະການແຕ່ປາງພະພຸດພະສຳມາ ຖືໄດ້ວ່າເປັນຮິດຄອງອັນເກົ່າແກ່

ແຕ່ວ່າໃນບ້ານຜາຕັ້ງແຫ່ງນີ້ມີຄອບຄົວແມ່ມ້າຍຜົວຕາຍປະ ນາງຕ້ອງຍອມລ້ຽງລູກນ້ອຍຄົນດຽວຕາມລຳພັງ ທຸກວັນນາງຈະພາລູກນ້ອຍຂອງນາງອອກໄປສວນໄປນາ ວັນນີ້ກໍ່ເຊັ່ນກັນ ພໍຕາເວັນພົ້ນຂອບຟ້າສີ້ນສຽງໄກ່ຜູ້ໂອກຂັນ ໄຫເຂົ້າພໍດີສຸກ ຫັຼງຈາກປັ້ນເຂົ້າເຊົ້າແລ້ວນາງກະຈູງເອົາແຂວນລູກອອກໄປທົ່ງນາຕາມປົກກະຕິ ທ່າມກາງສາຍຕາສຽງປາກຂອງຊາວບ້ານ

ວ່າເປັນຄົນຂວາງບ້ານພານເມືອງ ເປັນຄົນທີ່ສ້າງແຕ່ຄວາມອັບອາຍໃຫ້ແກ່ບ້ານເມືອງ ບໍ່ຟັງຄວາມໄທບ້ານ ບໍ່ປະຕິບັດຕາມຮິດຕາມຄອງ,​ ດັ່ງນັ້ນຈື່ງເຮັດໃຫ້ໄທບ້ານໃຜກໍ່ຕ່າງມີຄວາມຊີງຊັງຕໍ່ນາງແລະລູກ ແຕ່ນາງກະບໍ່ເຄີຍສົນໃຈກັບຄຳກ່າວນິນທາຕໍ່ວ່າ ນາງຕັ້ງໜ້າຕັ້ງຕາຫາຢູ່ຫາກີນລ້ຽງລູກຂອງນາງດ້ວຍຕົວເອງ ໄປສືບມື້ຊື້ວັນໄປຕາມພາສາແມ່ມ້າຍລ້ຽງລູກດ່ຽວ.

ວັນນີ້ທີ່ບ້ານຜາຕັ້ງອາກາດສົດໃສ ແສງແດດອ່ອນສ່ອງຜ່ານມ່ານໝອກເປັນເງົາກ້ອງໃສ່ໜ້າຜາ ອີກຝາກຍັງເປັນຮົ່ມມືດເພາະຕາເວັນຍັງບໍ່ທັນໂຜ່ນພົ້ນໜ່ວຍພູ ມີສຽງນົກນ້ອຍຮ້ອງຈີແຈວຢູ່ເທີງຜາທີ່ມີປ່າອັນຂຽວກະຈີ ສຽງຜູ້ຄົນເວົ້າຈາກັນດັງມາເປັນຍ່ານ ບວກໃສ່ສຽງເປັດສຽງໄກ່ໝູໝາງົວຄວາຍ ເບີ່ງໄປໄກໆເຫັນທົ່ງຫຍ້າປ່າແປກພວກຂຽວອ່ອນໆ ມີຝູງມ້າຝູງງົວມັນກ່ຳລັງກີນຫຍ້າ ບາງຜ່ອງກໍ່ແລ່ນໄລ່ກັນຫາງາຍໄປກັບມ່ານໝອກທີ່ເປັນສີຂາວກະຈ່າງປິດບັງໄລຍະການມອງເຫັນ.​

ເນື່ອງຈາກວັນນີ້ເປັນມື້ພັກມື້ຜ່ອນຫຼັງຈາກທີ່ສູ້ງານຢູ່ກັບໄຮ່ກັບນາມາເປັນເວລາຫຼາຍວັນ ຈື່ງໄດ້ມີໂອກາດໄດ້ເຫັນໜ້າເຫັນຕາກັນ ຕາມວິຖີຊີວິດຂອງປະຊາຊົນເຖີງວ່າຈະຢູ່ບ້ານໄກ້ເຮືອນຄຽງແຕ່ກໍ່ບໍ່ໄດ້ໝາຍຄວາມວ່າຈະໄດ້ພົບພໍ້ກັນທຸກວັນ ເພາະຕ່າງຄົນຕ່າງມີໜ້າທີຮັບຜິດຊອບພໍໃຜພໍລາວ ຕື່ນມື້ເຊົ້າໄດ້ຫໍ່ເຂົ້ານ້ອຍແລ້ວກໍ່ໄປຢູ່ໄຮ່ຢູ່ສວນ ຈົນຕາເວັນຕົກນົກເຂົ້າຮັງ ຄ່ຳມືດຈືດຕາຈື່ງໄດ້ກັບບ້ານເມືອນອນດ້ວຍຄວາມອິດອ່ອນລ້າ

ສະນັ້ນໃນວັນພັກຜ່ອນຈື່ງມີການເຕົ້າຊຸມນຸມເປັນວົງເລົ່າເລື່ອງໄຮ່ເລື່ອງນາເປັນກັນຟັງຕາມພາສາຊາວບ້ານ ໃນວົງຈະແບ່ງເປັນວົງຂອງຜູ້ຍີງແລະວົງຂອງຜູ້ຊາຍ ສາເຫດທີ່ແຍກກໍ່ເພາະຜູ້ທີ່ເປັນເພດດຽວກັນຈະເວົ້າຈາເຂົ້າກັນດີກ່ວາເພດກົງກັນຂ້າມ ວົງຂອງພວກຜູ້ຊາຍກໍ່ຈະມີເຫຼົ້າໄຫ ລີນກັນຈັກກັອກສອງກັອກພໍຄໍຊຸ່ມ ພໍແຕ່ເຫຼົ້າເຂົ້າປາກກໍມີເລື່ອງເວົ້ານົວຫົວມ່ວນກັນເປັນທຳມະດາ ສ່ວນວົງໝູ່ຜູ້ຍີງກໍ່ຈະມີລູກເລັກເດັກແດງບໍ່ຈັກຮ້ອງຈັກໄຫ້ດັງກະໜ່ຳ ນີ້ລະຄືວິຖີຊີວິດໄທບ້ານນອກຂອກຂະແມ.​

ພໍແຕ່ຕາວັນສູງພຽງບ່າ ກ້ອນຂີ້ຟ້າຄ່ອຍຫ່າງຈາກກັນ ເຫັນແຕ່ທ້ອງຟ້າສີຄາມ ດົນໆຈະມີລົມພັດມາຫູດໜື່ງ ໃນທັນທີທັນໃດເຫດການໃນບ້ານກໍ່ມີສຽງຮ້ອງແຕກຕື່ນຂອງຜູ້ຄົນດັງສະໜັ່ນ ມີສຽງໝາເຫົ່າວົນໄປວຽນມາ ຄ້າຍກັບວ່າພວກເຂົາກ່ຳລັງໄລ່ສັດນີ້ລະ ແຕ່ວ່າເຫດການນັ້ນເປັນຄວາມຈີງເພາະຂະນະທີ່ຊາວບ້ານກ່ຳລັງນັ່ງຊຸມວົງກັນຢູ່ນັ້ນ ມີໝາໄລ່ຟານດ່ອນມາແຕ່ທາງໃດກະບໍ່ຮູ້ເຂົ້າມາໃນບ້ານ ຊາວບ້ານຈື່ງຊ່ວຍກັນລັດອ້ອມຕີແມວ ຈົນມັນບໍ່ມີທາງໄປໃນທີ່ສຸດກໍ່ຖືກຂ້າລົງຢ່າງບໍ່ມີລິດ

ເມື່ອກ່າວເຖີງຟານດ່ອນນັ້ນຖືໄດ້ວ່າເປັນສັດທີ່ປະຫຼາດ ເປັນສັດທີ່ເທບໂປດປານ ຖ້າມີສັດປະເພດນີ້ປະກົດຕົວໃນທີ່ໃດສະແດງວ່າທີ່ນັ້ນຈະມີເຫດຮ້າຍເພດໄພເກີດຂື້ນ ປຽບດັ່ງເຫດການແຈ້ງເຕືອນລ່ວງໜ້າວ່າໜູ່ບ້ານກ່ຳລຫງຈະມີເຄາະຮ້າຍຫຼືເຫດຮ້າຍຈະເກີດກັບຄົນໃນໝູ່ບ້ານ ແຕ່ພວກຊາວບ້ານບໍ່ໄດ້ສົນໃຈກັບເຫດການທີ່ຈະເກີດໃນພາຍພາກໜ້າ ໜ່ຳຊ້ຳຕ່າງພາກັນມ່ວນຊື່ນໂຮຮ້ອງ ແລະສົນໃຈກັບສັດທີ່ມີຄວາມແຕກຕ່າງຜິດສັງເກດ ຕ່າງຄົນຕ່າງກໍ່ຕັ້ງຂໍ້ສັງເກດໄປຕ່າງໆນາໆ ແຕ່ສຸດທ້າຍກໍ່ເອກະສັນແປ່ງປັນກັນກີນຕາມປະເພນີຂອງບ້ານ

ເຊີ່ງຖ້າຊາວບ້ານຮ່ວມກັນຂ້າສັດໃຫຍ່ໄດ້ແມ່ນຈະແບ່ງໃຫ້ແຕ່ລະຄົວເຮືອນຢ່າງທົ່ວເຖີງ ໂດຍບໍ່ມີການລະເວັ້ນ ມື້ນີ້ກະເຊັ່ນກັນຊາວບ້ານໄດ້ແບ່ງຊີ້ນຟານຕາມຫົວເຮືອນ ຂາດຢູ່ເຮືອນຫຼັງໜື່ງນັ້ນກະຄືເຮືອນຂອງແມ່ມ້າຍທີ່ຊາວບ້ານຕ່າງຊີງຊັງແລະຈະບໍ່ແບ່ງໃຫ້ ແຕ່ສຸດທ້າຍຍ້ອນຄວາມຈຳເປັນຈື່ງໄດ້ຕົກລົງແບ່ງກະດູກລ້ອມທີ່ມີຊີ້ນຕີດໃຫ້ ແລ້ວນຳໃສ່ຖົງໄປເກາະໄວ້ທີ່ປະຕູເຮືອນ ເພາະແມ່ມ້າຍບໍ່ຢູ່ເຮືອນ.​

ຄ້ອນຄ່ຳພໍກັບຈາກນາເຫັນຖົງກະດູກໜ້ອຍຢູ່ໜ້າປະຕູເຮືອນ ນາງຈື່ງເກີດຄວາມແປກໃຈວ່າໃຜທີ່ເອົາກະດູກລ້ອມມາເກາະໃວ້ໜ້າເຮືອນຂອງຕົວ ຈື່ງໄດ້ກວດກາເບີ່ງຈື່ງຮູ້ວ່າເປັນກະດູກທີ່ປອກຊີ້ມອອກໝົດແລ້ວ ນາງເລີຍຄິດວ່າອາດຈະແມ່ນຊາວບ້ານບໍຄົນໃດກະຄົນໜື່ງທີ່ເຮັດຂົ່ມເຮັດງານນາງແລະລູກ ດັ່ງນັ້ນນາງຈື່ງຕັດສີນໃຈໂຍນກະດູກໃຫ້ໝາຄາບໄປກີນແລ້ວກໍ່ກ້າວຂາເຂົ້າເຮືອນໄປ.

ກ່າວເຖີງຈັນທາທີ່ຊຽງແດດທີ່ຮັກຂອງສີດາ ຕັ້ງແຕ່ເຊົ້າມາຮູ້ສືກວ່າຄິດຮອດນ້ອງສີດາຜູ້ເປັນຍອດຊູ້ດວງໃຈຈົນເປັນອັນກີນອັນນອນບໍ່ໄດ້ ບໍ່ວ່າຈະເຮັດຫຍັງອັນໃດພາບຂອງຍອດຍີງອັນເປັນທີ່ຮັກກໍ່ລອຍມາໃຫ້ເຫັນ ດັ່ງນັ້ນຈື່ງຕັດສີນໃຈຂີ່ມ້າທີ່ເປັນຄູ່ຂາມຸ່ງໜ້າ ຂື້ນພູຜ່າດົງເດີນທາງມາຫານວນນ້ອງສີດາ ແສງຕາເວັນທີ່ສ່ອງລອດກີ່ງໄມ້ມາເປັນເລົາປະທະກັບສາຍນ້ຳທີ່ໃສສະອາດແນມເຫັນເປັນແວວມະນີລະຍັບລະຍິບ ມີໝູ່ປາລອຍເລື່ອນວົນໄປໆມາໆເປັນຝູງ

ເມື່ອມີຄົນມາໃກ້ພວກມັນກໍ່ແຕກຍ່າວ ສຽງນ້ຳທີ່ໄຫຼຜ່ານໂງ່ນຫີນຕົກລົງແກ້ງລົງຕາດສຽງດັງສະໜັ່ນ ບາງຄັ້ງມີສາຍລົມພັດມາເປັນຮູດປະທະກັບອາຍນ້ຳຊູໃສ່ຮ່າງກາຍຂົນໜາວແຕກຍ່າວ ດອກຄະດອກກໍ່ບິວຈາກຕົ້ນລົງຈັບຢູ່ໜ້ານ້ຳ ແລ້ວໄຫຼມາເປັນແພເຮັດໝູ່ຕາຕ່າງພາກັນສວບເປັນບ້ອນຢ່າງສະໜັ່ນໜ້ານ້ຳ ເມື່ອເດີນທາງຜ່ານປ່າດົງກໍ່ເຫັນດອກໄມ້ນາໆພັນກ່ຳລັງເບັ່ງບານມີສີແດງສີອອນສີເຫຼືອງ ບາງບາງມີໝູ່ແມງເຜີ້ງກ່ຳລັງດູດກີນເກສອນຢ່າງເມົາມັນ

ມີແມງຜີເສື້ອຈັບຢູ່ເປັນກຸ່ມເມື່ອມີຄົນມາໃກ້ມັນຕ່າງບີນຂື້ນເປັນພາບທີ່ສວຍງາມ ດົງໄມ້ສີຂຽວມີສຽງນົກສຽງສະນີຮ້ອງສົ່ງມາແຕ່ໄກ ລີງນ້ອນທີ່ເຝີກປີນຕົ້ນໄມ້ໂດດກີ່ງນີ້ໃສ່ກີ່ງນັ້ນພ້ອມກັນສຽງຮ້ອງດ້ວຍຄວາມມ່ວນຊື່ນ.​ ໃນທີ່ຕາເວັນຄ້ອນທ້າວກໍ່ເດີນທາງຮອດເຂດແດນຂອງບ້ານຜາຕັ້ງ

ເນື່ອງຈາກເປັນເວລາຄ້ອຍຄ່ຳລົງຕາເວັນຍັງບໍ່ທັນລັບຂອບຟ້າ ຖ້າຈະພຸ່ງພ່ານເຂົ້າໄປຕອນນີ້ກະຖືວ່າບໍ່ເປັນການໃຫ້ກຽດນາງທ້າວຈື່ງຢຸດມ້າໃວ້ທີ່ເປີ້ນພູກ້ອງຮົ່ມແປກ ປ່ອຍໃຫ້ມ້າໄດ້ກີນຫຍ້າ ສ່ວນທ້າວກໍ່ຕັ້ງໃຈແນມເບີ່ງບ້ານຜາຕັ້ງ ໃນໃຈຄິດຮອດໜ້ານາງຍາກໃຫ້ຕາເວັນລັບລົງໂດຍໄວຈະໄດ້ເຫັນໜ້ານາງ ນັ່ງຢູ່ທີ່ເນີນພູທ້າວຈື່ໄດ້ວ່າເຮືອນນາງສີດາແມ່ນຫຼັງໃດ

ແສງແດດອ່ອນໆໃນຍາມໃກ້ອັດສະດົງມັນເຫັນໃຫ້ພາບທົ່ງນາປະສານກັນທົ່ງທີ່ຂຽວກະຈີດຸດດັ່ງພາບວາດຂອງຈິດຕະກອນເອກ ມີຫອມກີ່ນຂອງຕົ້ນເຂົ້າແວ່ວມາຕາມສາຍລົມ ສຽງກະໂລ່ງງົວຄວາຍໄລ່ລຽງກັນກັບຄອນ ມີຄວນຈາກເຕົາໜື້ງເຂົ້າເຂົ້າຈາກຫຼັງຄາເຮືອນແລ້ວກໍ່ຈາງຫາຍໄປຕາມສາຍລົມ ທ້ານຈັນທານັ່ງໃຈລອຍວາດພາບຄວາມງາມຂອງທຳມະຊາດໄປຈົນຕາເວັນຄ່ຳຄ້ອນລັບລົງຂອບຟ້າຢ່າງຫງຽບສະນິດພ້ອມທັງສຽງຮ້ອງສົ່ງຂອງໝູ່ມວນສາລິກາ

ເມື່ອຄວາມມືດເຂົ້າຢືດພາບທົ່ງນາຮ່ອມຫ້ວຍພູຜາ ໄດ້ເວລາໄປແອ່ວສາວແລ້ວ ຕາມວິທີການປະຕິບັດຂອງຊາວລາວບູຮານ ຊາຍໝຸ່ມຖ້າຢາກຈະໄປກຫຼີ້ນສາວແມ່ນຕ້ອງລໍໃຫ້ຕາເວັນລັບກ່ອນ ແລະຕ້ອງເປັນເວລາທີ່ຄອບຄົວໄດ້ກີນເຂົ້າແລງ ເວລາກໍ່ບໍ່ແມ່ນວ່າຊິຄ້ອນເດີກເປັນເວລາທີ່ສາວໆຫາກໍ່ເຂົ້ານອນຍັງບໍ່ທັນຫັຼບເພາະຖ້າຫຼັບແລ້ວອາດຊິບໍ່ໄດ້ຫຍີນສຽງເອີ້ນ ທີ່ຕ້ອງໄດ້ເອີ້ນນັ້ນກໍ່ເປັນອີກແບບໜື່ງທີ່ເວລາໄປຫຼີ້ນສາວ ເພາະຖ້າໄປຕອນທີ່ໄທເຮືອນຍັງກີນເຂົ້າຫຼືຍັງມີວຽກຢູ່ນັ້ນຖືວ່າເປັນການເສຍມາລະຍາດ ຜູ້ເຖົ້າຜູ້ແກ່ເພີ່ນຖື

ແຕ່ຖ້າວ່າທັງຄູ່ບ່າວຄູ່ສາວຕົກລົງກັນແລ້ວຈື່ງອ່າວຫາພໍ່ແມ່ເຖົ້າແກ່ລຸງຕາມາເວົ້າຈ່າວຂໍຕາມຮິດຄອງປະເພນີ ເວລານັ່ງລົມກັນກໍ່ຕ້ອງນັ່ງຫ່າງໆບໍ່ໃຫ້ມີການລວນລາມ ຖ້າມີກ່ນລະເມີດແມ່ນຈະຕ້ອງເສຍຄ່າເຂົ້າຄ່າຂັວນຄ່າສູ່ຂັວນເຮືອນເພາະຖືວ່າເປັນລົບລູ່ຜີຢ້າວຜີເຮືອນ ສ່ວນການລົມສາວກະບໍ່ໃຫ້ກາຍທ່ຽງຄືນເພາະມື້ຕໍ່ມາຍັງຊິໄດ້ໄປໄຮ່ເປັນນາອາດເຮັດໃຫ້ອິດອ່ອນລ້າ.

​ ເມື່ອສັງເກດວ່າແສງໄຟຈາກກະຕຽງໄມ້ໄຜ່ດັບລົງກະຖືວ່າເວລາເໝາະສົມ ທ້າວຈັນທາຈື່ງຜູກມ້າໄວ້ກ້ອງຕະລ່າງເຮືອນ ສີ່ງໝື່ງທີ່ທ້າວສັງເກດເຫັນໃນແຕ່ລະກ້ອງລ່າງຂອງແຕ່ລະເຮືອນຈະເສົາທີ່ເປັນທ່ອນໄມ້ກອງກັນຢູ່ເປັນກອງ ແລະໃນບ້ານກະຫງຽບສະນິດຕ່າງຈາກຫຼາຍຄັ້ງທີ່ເຄີຍມາ ຈື່ງຄິດແປກໃນໃຈວ່າ ໂອ່…​ນີ້ແມ່ນເພີ່ນພ້ອມກັນຊິເຮັດເຮືອນໃໝ່ບໍ?​ເບີ່ງຄືວ່າເຮືອນຫັຼງໃດກະມີເສົາມີໄດ້ເຕັມໄປໝົດ..​ແຕ່ທ້າວກະບໍ່ໄດສົນໃຈພໍປານໃດເພາະໃຈຢາກເຫັນໜ້ານາງສີດາໃຈຈະຂາດຢູ່ແລ້ວ ເມື່ອຜູກມ້າໄວ້ແລ້ວທ້າວກະເອີ້ນອອກໄປວ່າ…​

ນ້ອງຫຼ້າສີດາ ມື້ນີ້ອ້າຍຈັນບຸກປ່າຜ່າໝາມມາຫານ້ອງ ນ້ອງນອນຫຼັບແລ້ວບໍນໍຖ້າຍັງບໍ່ຫຼັບລຸກມາເວົ້ານຳອ້າຍຜູ້ມາແຈ່ໄກແດ່ນ້ອງຫຼ້າ…..​ທາງຝ່າຍນາງສີດາພໍແຕ່ໄດ້ຫຍີນສຽງເອີ້ນຂອງຊາຍຍອດຊູ້ກະຟ້າວລຸກອອກຈາກບ່ອນໃຕ້ກະຕຽງແລ້ວເຊີນອ້າຍຈັນທາຂື້ນມາເທີງເຮືອນ ພ້ອມຫານ້ຳມາສູ່ ພໍແຕ່ເຫັນໜ້າກັນທັງສອງຕ່າງມີຄວາມສຸກ ຮອມຍີ້ມພ້ອມສຽງເວົ້າຈາທຸກສີ່ງລ້ວນແຕ່ຫວານສ້ອຍ ເບີ່ງຄືວ່າຄວາມຄິດຮອດທີ່ທັງສອງມີໃຫ້ກັນມັນໄດ້ຈ່າງຫາຍໄປຈາກຫົວໃຈ ເມື່ອຖາມຂ່າວຖາມຂ່າວພໍຫອມປາກຫອມຄໍແລ້ວ ທ້າວຈື່ງຖາມນາງວ່າ:

ມື້ຫນ້ານີ້ບ້ານນ້ອງຊິມິງານປຸກເຮືອນໃໝ່ບໍ?​ອ້າຍເຫັນເພີ່ນກຽມໄມ້ໄວ້ເຕັມກາງບ້ານ ພໍແຕ່ໄດ້ຫຍີນຄຳຖາມນາງກໍ່ເລີຍຮູ້ສືກແປກໃຈຈື່ງຕອບໄປວ່າ ບໍ່ມີງານຫຍັງດອກອ້າຍບຊ່ແມ່ນອ້າຍຄິດຮອດນ້ອງຈົນຕາລາຍບໍ?​ ບໍ່ດອກນ້ອງສີດາອ້າຍເຫັນໄມ້ກອງເຕັມບ້ານເລີຍ ຄັນນ້ອງວ່າອ້າຍເວົ້າບໍ່ຈີງອອກໄປເບີ່ງກະໄດ້,​ ໃນໃຈນາງຮູ້ດີວ່າມື້ນີ້ໃນບ້ານບໍ່ມີໃຜກຽມໄມ້ຈະເຮັດເຮືອນໃໝ່ດອກແຕ່ນາງກະບໍ່ຢາກໂຕ້ຖຽງຈື່ງປ່ຽນເລື່ອງລົມ ໂດຍນາງຍົກແຂວນຂື້ນແລ້ວຖາມທ້າວວ່າແຫວນນ້ອງງາມບໍ?​

ທ້າວກະຕອບນາງວ່າງາມແທ້ ນາງຈື່ງເລົ່າໃຫ້ທ້າວຟັງວ່າ ແຫວນນັ້ນເປັນແຫວນທີ່ພໍ່ໃຊ້ໝັ້ນແມ່ ແລະເປັນຂອງຂວັນສີ້ນສຸດທ້າຍທີ່ແມ່ມອບໃຫ້ກ່ອນທ່ານຈະຈາກໂລກນີ້ໄປ ພໍແຕ່ເວົ້າສຸດຄວາມນາງກໍ່ຖອກເອົາແຫວນຈານີ້ວມອບໃຫ້ທ້າວພ້ອມທັງເວົ້າຂື້ນວ່າ ອ້າຍຈື່ງເກັບມັນໄວ້ໃຫ້ດີມັນຈະຄຸ້ມຄອງໃຫ້ອ້າຍປອດໄພໃນເວລາຕ້ອງອອກໄປຄ້າຂາຍ ທ້າວພະຍາຍາມທີ່ຈະປະຕີເສດແຕ່ສຸດທ້າຍກະຕ້ອງຈຳໃຈຍອມຮັບ

ເພາະນັ້ນຄືຄວາມຕັ້ງໃຈຂອງນາງແລະນາງຈະບໍ່ຍອມປ່ຽນໃຈອັນໃດເດັດຂາດ ທ້າວເວົ້າວ່າອ້າຍເກັບມັນໄວ້ຢ່າງດີ ອ້າຍຮັກສາມັນດ້ວຍຊີວິດອ້າຍ ອີກບໍ່ນານອ້າຍຈະພາຜູ້ໃຫຍ່ມາສູ່ຂໍນ້ອງ ສອງເຮົາຈະໄດ້ອອກເຮືອນມີຊີວິດຄູ່ຮ່ວມກັນ ອ້າຍຈະດູແລຖະນຸຖະໜອມນ້ອງບໍ່ໃຫ້ຄວາມທຸກໃດໆ ອ້າຍສັນຍາຈະມີນ້ອງພຽງນາງດຽວຊິບໍ່ຂໍຮັກຍີງອື່ນສາວໃດອີກເລີຍ ຂໍໃຫ້ນ້ອງຈົ່ງເຊື່ອໃນຕົວອ້າຍສອງເຮົາຈະມີລູກມີຫຼານເຖົ້າແກ່ໄປພ້ອມກັນ.​

ທັງສອງຕ່າງກໍ່ໃຫ້ສັນຍາບັນຮ່ວມກັນ ໂອຄວາມຮັກມັນຊ່າງຢຸດການໝູນຂອງເວລາໄດ້ຈີງໆ ບັນຍາກາດທີ່ຫງຽບສະນິດ ໃນໝູ່ບ້ານມີແຕ່ແສງໄຟພຽງດວງດຽວທີ່ຮຸ່ງລິບລີ່ສ່ອງລອດຟະເຮືອນອອກມາ ມີສຽງເວົ້າພໍອຸ່ມໆຂອງທ້າວແລະນາງ ນອກຈານັ້ນທຸກສີ່ງຢຸດນີ້ງບໍ່ມີການເຄື່ອນໄຫວແຕ່ຢ່າງໃດ.​

ຄວາມແປກປະຫຼາດທີ່ຈັນທາໄດ້ພົບເຫັນຂະນະຕອນທີ່ກ້າວຂາເຂົ້າບ້ານຜາຕັ້ງນັ້ນ ທີ່ຈີງມຫນບໍ່ແມ່ນກອງໄມ້ຫືຼຂອນໄມ້ແຕ່ຢ່າງໃດ ມັນຄືກຸ່ມຂອງພະຍານາກທີ່ມາລວມຕົວກັນກ່ອນທີ່ຈະມີເຫດການອັນໜ້າກໍລະຫົນເກີດຂື້ນກັບບ້ານນ້ອຍແຫ່ງນີ້.

​ເວລາໄດ້ເດີນທາງມາເຖີງທ່ຽງຄື, ບັນຍາກາດຍີງຫງຽບເຂົ້າໄປອີກ ທັນທັນໄດກໍ່ເກີດເຫດການຄ້າຍໆແຜ່ນດີນໄຫວຢ່າງຮຸນແຮງ ຄ້າຍໆກັບວ່າແຜ່ນທັງແຜ່ນກັບລັງຈະຍຸບຕົວລົງ ເໜືອນດັ່ງພູທັງໜ່ວຍກ່ຳລັງຈະຖະຫົຼມ ມັນສັນຄອນໄປມາ ເຮືອນກໍ່ເໜັງຕີງໂຍກເຍກ ສຽງໝູ່ຄົນແຊວກັນສະໜັ່ນ ບໍ່ຈັນວ່າເປັດວ່າໄກ່ໝູໝາງົວຄວາຍ ຕ່າງໂອລະຫົນ ພ່າມກາງຄວາມມືດສະນິດເກີດການໂກລະຫົນແລະສຽງຮ້ອງທີ່ດັງສະໜັ່ນ

ສຽງມ້າຂອງທ້າວຮ້ອງບອກເຈົ້າຂອງພ້ອມໃຊ້ສອງທັງສອງເກົາພື້ນດີນສຽງດັງຄວດໆ ສຽງຮ້ອງໂກລະຫົນຄ່ອຍໆຫາຍໄປພ້ອມກັນສຽງນ້ຳທີ່ຖັ່ງອອກຈາກຕີນຜາແທບມີສຽງດີນຖະຫຼົ່ມດັງຮື່ມໆ ເມື່ອເປັນເຊັນນັ້ນທ້າວຈື່ງຈູງແຂວນທາງກະໂດດຂື້ນຫຼັງມ້າ ທັງສອງມຸ່ງໜ້າຊິອອກຈາກບ້ານແລະດີນກ່ຳລັງຍຸບມາໃກ້ເຂົ້າເລື້ອຍໆ ເຫດກໍລະຫົນເຮັດນາງສີດາພີກຕົກຈາຫຼັງມ້າ ມືຂອງນາງຈັບຄ້ວາໄດ້ຫາງມ້າມັນລາກນາງໄປໄດ້ໄລຍະໜື່ງ ແຕ່ນາງກັບເຫັນດີນຍຸບໃກ້ເຂົ້າມາເລື້ອຍໆ

ເພື່ອໃຫ້ຊາຍຄົນຮັກປອດໄພຈາກເຄາະກຳຄັ້ງນີ້ນາງຈື່ງເອີ້ນບອກຈັນທາວ່າ: ອ້າຍເອີຍ..​ຫາກແມ່ນໂຊກແຕ່ຟ້າ ວາດສະໝາບໍ່ພໍຊິໄດ້ເປັນຄູ່ ສອງເຮົາຮ່ວມເປັນແຕ່ຊູ້ໃນຊາດນີ້ ນ້ອງລໍອ້າຍຢູ່ທີ່ນີ້ເດີ ເວົ້າສຸດຄຳມືນາງກະປະຫາງມ້າທັນໃດສີ້ນສຸດສຽງຫ້ອງນາງກະຫາຍໄປກັບສາຍນ້ຳແລະຕະຝຸ່ນຄື້ນດີນຖະຫຼົ່ມ ສ່ວນທ້າວພໍດີວິດຈາກເຂດແດດບ້ານ ທະຍານມ້າມຸ່ງໜ້າສູ່ທາງກັບຊຽງແດດ ທາງທີ່ທ້າວເດີນໄປກໍ່ມີດີນຍຸບຕາມຫຼັງເປັນບ່ອນເປັນບ່ອນໄປ

ເມື່ອເປັນເຊັ່ນນັ້ນທ້າວຈື່ງຄິດໄດ້ວ່າຕົນເອງຍັງມີແຫວນຂອງສີດາ ລາວຈື່ງຕັດສີນໃຈຖອດແຫວນທີ່ນາງໃຫ້ໂຍນອອກໄປ ເພື່ອຫຼີກໜີຈາກຄວາມຕາຍໃນທີ່ສຸດເຫດການດີນຖະຫຼົ່ມກໍ່ຍຸດຕິລົງທີ່ທີ່ອ້າຍໂຍນແຫວນຂອງນາງສີດາ.​

ເຫດການໃນຄັ້ງນີ້ເຮັດໃຫ້ຊາວບ້ານແລະສັດສາວາສີ່ງໃນບ້ານຜາຕັ້ງຫາຍໄປແບບບໍ່ມີໃຜລອດຊີວິດ ບ້ານນ້ອຍທີ່ເຄີຍເປັນທີ່ຢູ່ອາໄສ ບ້ານທີ່ມີຄວາມສະຫງົບມີຍັບພະຍາກອນອັນອຸດົມສົມບູນ ຖືກມາແທນດ້ວຍໜອງນ້ຳທີ່ກ້ວາງໃຫຍ່ ເຫດການໃນຄັ້ງນີ້ເຮັດໃຫ້ຊາວບ້ານໃກ້ຄຽງຕ່າງຕົກຕະລືງໂດຍບໍ່ມີໃຜຄາດຄິດວ່າມັນຈະເກີດເຫດຮ້າຍພຽງນີ້

ຜູ້ຄົນຕ່າງເຊື່ອວ່າເປັນຍ້ອນຟານດ່ອນໂຕນັ້ນທີ່ຊາວບ້ານຂ້າມັນຄືສັດຂອງເທບຍ້ອນຊາວບ້ານໄປຫົຼບລູ່ເພີ່ນຈື່ງໄດ້ຮັບໂທດໄພຢ່າງທີ່ເຫັນ ບາງຄົນກະວ່າຍ້ອນຊາວບ້ານມີຄວາມກຽດຊັງຕໍ່ແມ່ມ້າຍບໍ່ແບ່ງຊີ້ນໃຫນາງກີນ ແລະອື່ນໆອີກຫຼາຍເຫດຜົນທີ່ຖືກນຳມາປຽບປານ.​ ເຫດການຜ່ານໄປໄດ້ຫຼາຍວັນໜອງນ້ຳຍັງຫງຽບສະນິດບໍ່ມີແມ້ນແຕ່ສາຍລົມພັດຜິວນ້ຳ ບໍ່ມີບ້ອນຂອງປາ ເຫັນແຕ່ຕັ່ງໜ່ວຍໜື່ງທີ່ຟູຂື້ນມາຈາກໜ້ານ້ຳ ປະຊາຊົນຈື່ງພາກັນເອີ້ນໜອງແຫ່ງນີ້ວ່າໜອງຕັ່ງ ສ່ວນໜອງທີ່ທ້າວຈັນທາໂຍນແຫວນຂອງນາງສີດາເອີ້ອນວ່າໜອງແຫວນ ປະຈຸບັນເອີ້ນວ່າໜອງຫວາຍ.

ກ່າວເຖີງທ້າວຈັນທາທີ່ລອດຕາຍເມື່ອເດີນທາງມາເຖີງບ້ານທ້າວກະບໍ່ມີຄວາມສຸກໃນໃຈຄິດຮອດແຕ່ນ້ອງສີດາ ຈົນບໍ່ເປັນອັຮກີນອັນນອນ ຮ່າງກາຍຈ່ອຍໂຊນແວວຕາທັງສອງມີຄວາມໂສກເສົ້າ ຍາມນອນກໍ່ຝັນເຫັນແຕ່ພາຍຂອງນາງຜູ້ເປັນຍອດຊູ້ດວງໃຈດັ່ງບົດກອນທີ່ວ່າ

ພີ່ນີ້ຄິດຮອດນ້ອງ.​ ນາງນາດສີດາ ຫຼ້າເອີຍ
ແມ່ນຈັກທຳການໃດ.​ ກໍ່ບໍ່ເປັນອັນແມ້ງ
ໄດ້ແຕ່ແຍງທ້ອງຟ້າ.​ ຍາມທີ່ຄິດຮອດອຸ່ນ
ໃຈມັນວຸ່ນມັນຮ້ອງ.​ ຮ່ຳຫານ້ອງຍອດສີດາ ພີ່ແທ້

ແມ່ນນາງໄປຢູ່ຫ້ອງ.​ ກ້ຳຝ່າຍແດນໃດ ສີດາເອີຍ
ເຈົ້າຊ່າງປະພີ່ຊາຍ.​ ມາໝົດຫວັງຄອງຖ້າ
ຊາດຊິມາຂໍໃຫ້ໄດ້.​ ສອງເຮົາຢ່າເຫີນຫ່າງ
ພີ່ຂໍຢູ່ຮ່ວມນ້ອງ.​ ກາບເທົ້າຊົວຊີວັນ

ຍ້ອນຄິດຮອດຄິດເຖີງແຕ່ນາງແລະຫວັງວ່າຈະໄດ້ພົບນາງອີກໃນຊາດຕໍ່ໄປທ້າວຂໍພອນຫາກຊາດຊິມາແມ່ນໃຫ້ໄດ້ຢູ່ຮ່ວມນາງຕະຫຼອດກາລະນານ ຊາດນີ້ທ້າວຈື່ງອຸທິດຕົນປວດເປັນພະ ເພື່ອຈະໄດ້ພາວະນາສ້າງບຸນສ້າງກຸນສົນເພື່ອຊາດໜ້າຈະໄດ້ຄອງຮັກກັບນາງຕາ ທ້າວພ່ຳພຽນພາວະນາຈົນກ່ວານາທີສຸດທ້າຍຂອງຊີດ ດວງວີນຍານຂອງທ້າວແລະນາງໄດ້ວົນວຽນມາພົບກັນອີກຄັ້ງໝື່ງ

ທັງສອງໄດ້ເກີດມາເປັນເງືອກທ້າວເງືອກນາງເປັນເຈົ້າຈອມຢູ່ທີ່ໜອງຕັ້ງ ດ້ວຍສັດຈາບັນຮັກຂອງທັງສອງໜອງຕັ່ງຈື່ງປ່ອງນ້ຳໃສ່ນ້ຳຕີງຢູ່ຊຽງແດດ ເພື່ອເຊື່ອມໃຫ້ທັງສອງເປັນທອງແຜ່ນດຽວກັນ ຖ້າໜອງຕັ່ງແຫ້ງນ້ຳຕີງກະແຫ້ງ ນ້ຳໜອງຕັ່ງໃສນ້ຳຕີງກະໃສ ເປັນແບບນີ້ໄປຊົ່ວກາລະນານຕາມຄຳສາບານຮັກຂອງທັງສອງ

ກ່າວເຖີງໂລກໃຕ້ບາດານອັນເປັນທີ່ຢູ່ຂອງພະຍານາກ ໃຕ້ຜືນນ້ຳທີ່ເປັນໜອງໃຫຍ່ແລະມີນ້ຳຂຽວກະຈີຕະຫຼອດປີ ເງືອກທ້າວກັບເງືອກນາງຄອງຮັກກັນຍ່າງມີຄວາມສຸກທັງສອງຈະບບໍ່ພາກຈາກກັນແມ້ນແຕ່ວິນາທີດຽວ ຈົນເຮັດໃຫ້ມີບໍລິບານຢ່າງຫຼວງຫຼາຍ ທັງສອງແລະບໍລິວານຂ່ວຍກັນປົກປັກຮັກຄວາມອຸດົມສົມບູນຂອງໜອງຕັ່ງ ເພື່ອຕອບສະໜອງໃຫ້ແກ່ດຳລົງຊີວິດຂອງປະຂາຊົນມະນຸດມະນາ ໂດຍຕ່າງຜ່ອງຕ່າງອາໄສບໍ່ບຽດບຽນເຊີ່ງກັນແລະກັນ

ທຸກປີຮອດຍາມບຸນອອກພັນສາຊາວບ້ານຈະມີການເລື້ອງບູຊາເງືອກທ້າວເງືອກນາງດ້ວຍການຈູດບັ້ງໄຟ ເຮັດພາຫວານເປັນການສະແດງເຖີງຄວາມນັບຖື ສືບທອດກັນມາ ຄຳວ່າເງືອກທ້າວກັບເງືອກນາງນັ້ນໜາຍເຖີງພະຍານາກທີ່ມີຄວາມຮັກຕໍ່ກັນດ້ວຍໃຈບໍລິສຸດ ເມື່ອຄັ້ງເປັນມະນຸດໄດ້ຈຳສີນພາວະນາໃນຄອງຮັກກັນ ເມື່ອສົມນິທານກໍ່ຈະໄດ້ຄອງຮັກກັນຢ່າງສົມໃຈ ການເກີດເປັນພະຍານາກຈະຢູ່ຍົງຄົງກະພັນແລະບໍ່ມີວັນຕາຍຈາກກັນດັ່ງຄຳຂໍ.

ເງືອກທ້າວເງືອກນາງຈະມີຄວາມຜູກພັນກັບມະນຸດ ຄັ້ງໝື່ງເງືອກໄດ້ແປງຮ່າງເປັນມະນຸດຂື້ນຈາກເມືອງບາດານ ເພື່ອມາຢືມຟືມຕ່ຳຫູ ເມື່ອເລາະໄດ້ຫຼາຍບ້ານກໍ່ບໍ່ມີໃຫ້ຢືມຈົມເຖີງເວລາຄ່ຳ ຊາວບ້ານຈື່ງຕ່າງອາຫານແລງໃຫ້ກີນ ແລ້ວຂໍໃຫ້ນອນພັກກ່ອນເພາະຕາເວັນຄ່ຳຄ້ອຍກັບບ້ານກໍ່ແສນຍາກລຳບາກ ທັງສອງຈື່ງຈຳໃຈຍອມ ແຕ່ບໍ່ຂໍນອນໃນຫ້ອງຂໍນອນໃນພ່າ ພ່າແມ່ນມີຮູບຄ້າຍກະບຸງແຕ່ຈະມີຄວາມເຫັນກ່ວາຫຼາຍເທົ່າ

ຄົນສະໄໝກ່ອນໃຫ້ພ່າເພື່ອເກັບວັດຖຸສີ່ງຂອງທີ່ໃຫຍ່ຫຼືວັດຖຸທີ່ມີຈຳນວນຫຼາຍ,​ເມື່ອເປັນເຊັ່ນນັ້ນຊາວບ້ານຈື່ງເຮັດຕາມຈຸດປະສົງ ແຕ່ກໍ່ຮູ້ສືກແປກໃຈວ່າເປັນຍັງຄູ່ຜົວເມຍຈື່ງຢາກນອນໃນພ່າ ແຕ່ກໍ່ບໍ່ໄດ້ເອີ່ຍເຖີງຂໍ້ສົງໃສແຕ່ຢ່າງໃດ ທຳຕາມທີ່ຄູ່ຜົວເມຍຂໍ ທັງສອງເຂົ້ານອນໃນພ່າແລະແສງໄຟກໍດັບລົງ ຕົກເຖີງຕອນເດີກ ເພາະເກີດຄວາມສົງໃສຈື່ງຢາກຮູ້ວ່າຄູ່ຜົວເມຍຈະນອນກັນຈັ່ງໃດ

ຈື່ງຕັດສີນໃຈໄຕ້ກະຕຽງມາສ່ອງເບີ່ງ ທັນໃດນັ້ນເຫັນມີງູຂຽວໃຫຍ່ສອງໂຕກ່ຳລັງກ້ຽວກັນຢູ່ ມັນມີຂະໜາດໃຫຍ່ຈົນເຕັມພ່າ ມີຫອນສີແດງ ດວງຕາໃຫຍ່ສຳກັບໝາກຊ້ານ ມີເກັດເປັນລາຍຕາມລຳຕົວ ລະຫ່ວາງເກັບມີສີເຫືຼອງຄຳຂັ້ນໄວ້ ຈື່ງເຮັດໃຫ້ຊາວບ້ານຕົກໃຈແຕກຕື່ນກັນວຸ່ນວາຍ ເມື່ອເປັນເຊັ່ນນັ້ນເງືອກທັງສອງຈື່ງຫາຍຕົວກັບເມືອງບາດານ ແລ້ວຫ້າມໃຫ້ບໍລິວານປະກົດຕົວໃຫ້ມະນຸດເຫັນ ຈົນກາບເທົ້າທຸກວັນນີ້ ເຮົາຈະເຫັນພະຍານາກແຕ່ໃນຮູບແຕ້ມເທົ່ານັ້ນ…..

ຂອບໃຈຂໍ້ມູນຈາກເພຈ: ເມືອງພວນ