ນ້ຳຂອງແຫ້ງລົງ ເກີດຈາກຫຼາຍສາເຫດ

ທ່ານ ບຸນເຕີມ ສີສຸ­ພັນທະວົງ ຫົວ­ໜ້າພະແນກພະ­ຍາ­ກອນອາ­ກາດ ແລະ ແຈ້ງເຕືອນໄພ ກົມອຸ­ຕຸ­ນິ­ຍົມ ແລະ ອຸທົກກະຊາດ ກະ­ຊວງຊັບ­ພະ­ຍາ­ກອນທຳມະຊາດ ແລະ ສິ່ງ­ແວ­ດລ້ອມ ໃຫ້ສຳ­ພາດກ່ຽວກັບສະ­ພາບແຫ້ງ­ແລ້ງປີ 2019 ທີ່ໄດ້ສົ່ງຜົນກະ­ທົບຕໍ່ລະ­ດັບນ້ຳ­ຂອງ ແລະ ສາ­ຂາແຫ້ງຜິດປົກ­ກະ­ຕິ ວັນທີ 25 ກໍ­ລະ­ກົດ 2019 ວ່າ: ໃນເດືອນມິ­ຖຸ­ນາສະ­ພາບນ້ຳ­ຂອງແຕ່ເໜືອ-ໃຕ້ ແຫ້ງຕ່ຳກວ່າປົກ­ກະ­ຕິ ຫຼື ຕ່ຳກວ່າລະ­ດັບເກນສະ­ເລ່ຍ ທຽບ­ໃສ່ເກນປົກ­ກະ­ຕິປີ 2006-2018 ປະ­ມານ 10-40% ແຕ່ເຂດນະ­ຄອນ­ຫຼວງວຽງຈັນ-ພາກໃຕ້ ຍົກ­ເວັ້ນເຂດຫຼວງພະບາງ ລະ­ດັບນ້ຳສູງກວ່າລະ­ດັບເກນສະ­ເລ່ຍ ແລະ ໃນເດືອນກໍ­ລະ­ກົດ ລະ­ດັບນ້ຳ­ຂອງຍັງສືບ­ຕໍ່ແຫ້ງແຕ່ເໜືອ-ໃຕ້ ມີລະ­ດັບຕ່ຳກວ່າລະ­ດັບເກນສະ­ເລ່ຍປະ­ມານ 21-74% ໃນນີ້ ຕ່ຳຫຼາຍກວ່າໝູ່ແມ່ນເຂດນະ­ຄອນ­ຫຼວງວຽງຈັນ ປະ­ມານ 73,5%

ເຊິ່ງສາ­ເຫດທີ່ເຮັດໃຫ້ນ້ຳ­ຂອງແຫ້ງລົງຕ່ຳກວ່າເກນສະ­ເລ່ຍຍ້ອນສະ­ພາບຝົນໃນປີ 2018 ແມ່ນສິ້ນສຸດໄວກວ່າເກນປົກ­ກະ­ຕິ ໂດຍສ່ວນໃຫຍ່ສິ້ນສຸດລະ­ດູ­ຝົນໃນກາງເດືອນກັນ­ຍາ ແລະ ໄດ້ເຮັດໃຫ້ລະ­ດັບນ້ຳຕາມສາ­ຂາຕ່າງໆໄດ້ແຫ້ງລົງຢ່າງຕໍ່ເນື່ອງ ຍ້ອນສະ­ພາບຜົນກະ­ທົບຈາກປາ­ກົດ­ການແອນນິນໂຢ້ ເຮັດໃຫ້ມີຝົນ­ຕົກໜ້ອຍ ແລະ ອາ­ກາດຮ້ອນອົບ­ເອົ້າຕໍ່ເນື່ອງກັນຫຼາຍວັນຕິດ­ຕໍ່ກັນ ແລະ ສະ­ພາບລົມມໍລະສຸມຕາ­ເວັນ­ຕົກສ່ຽງໃຕ້ມີກຳ­ລັງອ່ອນປົກຄຸມທົ່ວທຸກພາກຂອງປະ­ເທດລາວ ໄລ­ຍະກາງເດືອນມິ­ຖຸ­ນາ ຫາ ກໍ­ລະ­ກົດ ເຮັດໃຫ້ຝົນ­ຕົກໜ້ອຍ ແລະ ບາງທ້ອງ­ຖິ່ນມີຝົນຂາດຊ່ວງ.

ຕາມຂໍ້ມູນອ້າງອີງໃນປີ 2018 ໄດ້ກຳ­ນົດ ໂດຍອີງ­ໃສ່ປະ­ລິ­ມານນ້ຳຝົນວັດ­ແທກໃນແຕ່ລະມື້ ທົ່ວປະ­ເທດສິ້ນສຸດລະ­ດູ­ຝົນໃນໄລ­ຍະກາງເດືອນ 9 ມີແຕ່ຢູ່ແຂວງອັດຕະປືທີ່ສິ້ນສຸດລະ­ດູ­ຝົນໃນຕົ້ນເດືອນຕຸ­ລາ ແລະ ສະ­ພາບຂອງແອນນິນໂຢ້ແຕ່ເດືອນມັງ­ກອນ-ກໍ­ລະ­ກົດ 2019 ຢູ່ໃນເຂດມະ­ຫາສະ­ໝຸດປາຊີຟິກຕອນກາງ ປົກຄຸມດ້ວຍສະ­ພາບຂອງແອນນິນໂຢ້ ທີ່ເຮັດໃຫ້ອຸນ­ຫະ­ພູມຢູ່ໃນເຂດມະ­ຫາສະ­ໝຸດຕອນກາງ ໂດຍສະ­ເພາະເຂດໃກ້ເສັ້ນສູນສູດໄດ້ສູງກວ່າເກນປົກ­ກະ­ຕິ ສະ­ເພາະຕະ­ຫຼອດໄລ­ຍະເດືອນມີ­ນາ-ກໍ­ລະ­ກົດ

ອຸນ­ຫະ­ພູມສະ­ເລ່ຍໜ້າ­ນ້ຳທະ­ເລໄດ້ຮ້ອນສູງຂຶ້ນກວ່າເກນປົກ­ກະ­ຕິປະ­ມານ 0,7 ອົງ­ສາ ເຊິ່ງໄດ້ເຮັດໃຫ້ປາ­ກົດ­ການຂອງແອນໂຊ (ENSO) ຍັງຢູ່ໃນສະ­ພາ­ວະຂອງແອນນິນໂຢ້ທີ່ມີກຳ­ລັງອ່ອນ ໃນເມື່ອເກີດມີປາ­ກົດ­ການດັ່ງ­ກ່າວເຮັດໃຫ້ ສປປ ລາວ

ຈະມີອາ­ກາດຮ້ອນ ຝົນ­ຕົກໜ້ອຍ ແລະ ມໍລະສຸມຕາ­ເວັນ­ຕົກສ່ຽງໃຕ້ໄລ­ຍະເດືອນພຶດ­ສະ­ພາ-ກໍ­ລະ­ກົດ ຍັງປົກຄຸມດ້ວຍກຳ­ລັງອ່ອນ ເຮັດໃຫ້ຝົນ­ຕົກໃນລະ­ດັບຄ່ອຍຫາປານກາງ ແລະ ຈະຕົກໜັກໃນບາງທ້ອງ­ຖິ່ນ ສາ­ມາດສັງລວມປະ­ລິ­ມານນ້ຳຝົນແຕ່ເດືອນມັງ­ກອນ-ວັນທີ 24 ກໍ­ລະ­ກົດ 2019 ຝົນທົ່ວທຸກພາກປະ­ມານ 50% ຈະມີປະ­ລິ­ມານນ້ຳຝົນຫຼາຍຢູ່ຫຼັກ 20 ແລະ ທ່າແຂກ ປະ­ມານ 55-57%.ຕໍ່ສະ­ພາບການທີ່ກ່າວມານັ້ນ ທ່ານ ບຸນເຕີມ ສີສຸ­ພັນທະວົງ ໄດ້

ຮຽກ­ຮ້ອງມາຍັງຜູ້ທີ່ນຳໃຊ້ນ້ຳໂດຍສະ­ເພາະວຽກງານກະ­ສິ­ກຳຄວນຈະມີການວາງແຜນກ່ຽວກັບການນຳໃຊ້ນ້ຳເພື່ອຮັບໃຊ້ວຽກກະ­ສິ­ກຳ ໃນນີ້ ການປູກ­ຝັງກໍຄວນປູກພືດທີ່ໃຊ້ນ້ຳໜ້ອຍ ແລະ ວຽກພະ­ລັງ­ງານໃຫ້ເອົາ­ໃຈ­ໃສ່ໃນການບໍ­ລິ­ຫານນ້ຳໃຫ້ພຽງ­ພໍຕໍ່ການຜະ­ລິດພະ­ລັງ­ງານໄຟ­ຟ້າ ແລະ ອື່ນໆ.

ຂອບໃຈຂໍ້ມູນ: ໜັງສືພິມວຽງຈັນໃຫ່ມ