ນາງງາມສີລັງກາ ຖືກນາງງາມລຸ້ນເອື້ອຍຢຶດມົງກຸດຄືນກາງເວທີ ໃຫ້ຮອງອັນດັບ1

ພຸດພິກາ ເດີ ຊິວວາ ຄວ້າຕຳແໜ່ງມິສຊິສສີລັງກາ ປີ 2021 ເຊິ່ງເປັນເວທີປະກວດສຳລັບຜູ້ຍິງທີ່ແຕ່ງງານແລ້ວ, ໄດ້ຈັດຂຶ້ນໃນວັນທີ 4 ເມສາ ທີ່ຜ່ານມາ. ໃນເວທີນີ້ ມີກົດຫ້າມບໍ່ໃຫ້ຜູ້ເຂົ້າປະກວດທີ່ແຕ່ງງານ ແລ້ວປະຮ້າງກັບສາມີມາປະກວດນາງງາມ.

ເມື່ອນາງງາມຮຸ່ນເອື້ອຍຊື່ວ່າ ແຄໂຣລາຍ ຈູຣີ ເຫັນຜູ້ທີ່ໄດ້ຕຳແໜ່ງກໍໄດ້ເຂົ້າໄປດຶງເອົາມົງກຸດທີ່ຢູ່ເທິງຫົວຂອງ ເດີ ຊິວວາ ແລ້ວເອົາໄປໃສ່ໃຫ້ຮອງອັນດັບ 1 ແທນ ແລະ ໄດ້ບອກວ່າ ເດີ ຊິວວາ ບໍ່ເໝາະສົມທີ່ຈະໄດ້ຮັບຕຳແໜ່ງນາງງາມ ເພາະລາວໄດ້ປະຮ້າງກັບສາມີແລ້ວ ຈຶ່ງເປັນບຸກຄົນທີ່ຂາດຄຸນສົມບັດ ບໍ່ປະຕິບັດຕາມກົດລະບຽບ. ເຫດການດັ່ງກ່າວສ້າງຄວາມຕົກໃຈໃຫ້ແກ່ຜູ້ຊົມການປະກວດ ແລະ ເດີຊິວວາເມື່ອຖືກນາງງາມຮຸ່ນເອື້ອຍເຮັດແບບນັ້ນໃສ່ ກໍຍ່າງລົງຈາກເວທີໃນທັນທີ.

ແຕ່ ເດີ ຊິວວາ ກໍຍັງໄດ້ຮັບຕຳແໜ່ງຄືເກົ່າ ເພາະທາງກອງປະກວດໄດ້ຊີ້ແຈງ ແລະ ຢືນຢັນວ່າ ເດີ ຊິວວາ ບໍ່ແມ່ນແມ່ຮ້າງຄືທີ່ຖືກກ່າວຫາ. ນອກຈາກນີ້ ເດີ ຊິວວາ ກໍໄດ້ອະທິບາຍໃຫ້ຮູ້ວ່າ: ຕົນເອງກັບສາມີນັ້ນ ໄດ້ແຍກກັນຢູ່ ແຕ່ບໍ່ໄດ້ຈົດທະບຽນປະຮ້າງກັນເລີຍ. ພ້ອມກັນນີ້ລາວຍັງໄດ້ອະທິບາຍໃນເຟສບຸກຕື່ມອີກວ່າ: ຕົນຕ້ອງໄດ້ໄປໂຮງໝໍ ເພາະໄດ້ຮັບບາດເຈັບທີ່ຫົວ ຈາກການຖືກນາງງາມຮຸ່ນເອື້ອຍຍາດມົງກຸດໄປໃສ່ໃຫ້ຮອງອັນດັບ 1 ແລະ ຈະກຽມຟ້ອງຮ້ອງ ຄົນທີ່ເຮັດໃຫ້ລາວໄດ້ຮັບບາດເຈັບ.

ຜູ້ອຳນວຍການກອງປະກວດ ມິສຊິສສີລັງກາ ໄດ້ຢືນຢັນກັບທາງ BBC ວ່າ: ມົງກຸດແມ່ນໄດ້ມອບຄືນໃຫ້ແກ່ ເດີ ຊິວວາ ຄືນເປັນທີ່ຮຽບຮ້ອຍແລ້ວໃນວັນທີ 6 ເມສາ 2021 ແລະ ກອງປະກວດຍັງໄດ້ກ່າວໂທດ ແຄໂຣລາຍ ຈູຣີ ທີ່ສະແດງພຶດຕິກຳບໍ່ເໝາະສົມເທິງເວທີ ແລະ ຈະດຳເນີນການສືບສວນທີ່ມາທີ່ໄປກັບເລື່ອງນີ້ໃຫ້ຈະແຈ້ງ.