ກະຊວງຕ່າງປະເທດ ລາວ-ຈີນ ພົບປະຫາລືຫລາຍບັນຫາສຳຄັນ ແບບທາງໄກ

ຂປລ. ໃນວັນທີ 3 ກຸມພາ 2021 ນີ້, ສະຫາຍ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະທາງໄກ ກັບ ສະຫາຍ ຫວັງ ອີ້ ທີ່ປຶກສາແຫ່ງລັດ, ລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ ເພື່ອສືບຕໍ່ຈັດຕັ້ງຜັນຂະຫຍາຍຜົນການສົນທະນາໂທລະສັບທາງໄກ ລະຫວ່າງ ສອງເລຂາທິການໃຫຍ່ຄະນະບໍລິຫານງານສູນກາງພັກ ຂອງ ສປປ ລາວ ແລະ ສປ ຈີນ ໃນຄັ້ງວັນທີ 21 ມັງກອນ 2021 ຜ່ານມາ.

ໃນໂອກາດນີ້, ສະຫາຍ ຫວັງ ອີ້ ໄດ້ສະແດງຄວາມຊົມເຊີຍຕໍ່ຜົນສໍາເລັດກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ແລະ ຊົມເຊີຍລັດຖະມົນຕີກະຊວງການຕ່າງປະເທດລາວ ທີ່ ໄດ້ຮັບເລືອກຕັ້ງເປັນ ກໍາມະການກົມການເມືອງສູນກາງພັກໃນກອງປະຊຸມໃຫຍ່ດັ່ງກ່າວ, ເຊິ່ງສະຫາຍລັດຖະມົນຕີກະຊວງການຕ່າງປະເທດລາວ ກໍ່ໄດ້ສະແດງຄວາມຂອບໃຈຕໍ່ການນຳພັກ-ລັດ ແຫ່ງ ສປ ຈີນ ທີ່ໄດ້ສົ່ງໂທລະເລກຊົມເຊີຍ ຕໍ່ຜົນສຳເລັດຂອງກອງປະຊຸມໃຫຍ່ດັ່ງກ່າວ ກໍຄື ການຊົມເຊີຍສະຫາຍເອງ ທີ່ໄດ້ຮັບເລືອກຕັ້ງໃນກອງປະຊຸມຄັ້ງນີ້.

ນອກ ຈາກນີ້, ສະຫາຍ ສະເຫລີມໄຊ ກົມມະສິດ ຍັງໄດ້ສະແດງຄວາມຂອບໃຈ ຕໍ່ສະຫາຍຈີນ ທີ່ໄດ້ໃຫ້ການຊ່ວຍເຫລືອຖານມິດສະຫາຍ ເປັນຕົ້ນແມ່ນ ການຊ່ວຍເຫລືອທາງດ້ານອຸປະກອນການແພດ, ຢາປິ່ນປົວພະຍາດ ແລະ ວັກຊີນປ້ອງກັນພະ ຍາດໂຄວິດ-19 ໃຫ້ແກ່ ສປປ ລາວ ເຊິ່ງໄດ້ປະກອບສ່ວນເຮັດໃຫ້ລັດຖະບານລາວ ມີຜົນສໍາເລັດສູງໃນການປ້ອງກັນ ແລະ ສະກັດກັ້ນ ການແຜ່ລະບາດຂອງພະຍາດດັ່ງກ່າວໃນປັດຈຸບັນ.

ພ້ອມນີ້, ສອງຝ່າຍ ຍັງໄດ້ຕີລາຄາສູງຕໍ່ສາຍພົວພັນມິດຕະພາບ ທີ່ເປັນມູນເຊື້ອ ລະຫວ່າງ ລາວ ແລະ ຈີນ ກໍຄື ການເປັນຄູ່ຮ່ວມມືຍຸດທະສາດຮອບດ້ານ, ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມສະຕາກໍາ ລາວ-ຈີນ, ຈີນ-ລາວ ທີ່ນັບມື້ ນັບໄດ້ຮັບການເພີ່ມພູມຄູນສ້າງໃຫ້ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ, ເຊິ່ງສະແດງອອກໃນການພົບປະ ແລະ ແລກ ປ່ຽນການຢ້ຽມຢາມ ລະຫວ່າງການນຳຂັ້ນສູງ ຂອງສອງປະເທດຢ່າງເປັນປົກກະຕິ ລວມທັງການຈັດ ຕັ້ງປະຕິບັດບັນດາໂຄງການຮ່ວມມື ລະຫວ່າງສອງລັດຖະບານ ທີ່ມີຜົນສໍາເລັດສູງໃນໄລຍະຜ່ານມາ.

ນອກນີ້, ສອງຝ່າຍ ຍັງໄດ້ປຶກສາຫາລືກ່ຽວກັບຄວາມຄືບໜ້າ ໃນການຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ, ຈີນ-ລາວ ກໍຄື ການຮ່ວມມືຕ່າງໆໃນຂອບສອງຝ່າຍອື່ນໆ. ພິເສດ, ສອງຝ່າຍ ຍັງເຫັນດີເປັນເອກະພາບກັນ ໃນການຈັດຕັ້ງກິດຈະກຳຕ່າງໆ ເພື່ອສະເຫລີມ ສະຫລອງວັນສ້າງຕັ້ງສາຍພົວພັນການທູດລາວ-ຈີນ ຄົບຮອບ 60 ປີ (25 ເມສາ 1961-25 ເມສາ 2021) ແລະ ປີມິດຕະພາບລາວ-ຈີນ ເຊິ່ງການນໍາສູງສຸດ ຂອງສອງພັກ ໄດ້ປະກາດຢ່າງເປັນທາງການ ໃນໂອກາດສົນທະນາທາງໂທລະສັບ ໃນວັນທີ 21 ມັງກອນ 2021 ທີ່ຜ່ານມາ.

ສອງຝ່າຍ ຍັງໄດ້ປຶກສາຫາລືກ່ຽວກັບ ບັນຫາພາກພື້ນ ແລະ ສາກົນ ຈຳນວນໜຶ່ງ ທີ່ສອງຝ່າຍມີຄວາມສົນໃຈ ລວມທັງການຮັດແໜ້ນການຮ່ວມມື ໃນຂອບພາກພື້ນ ແລະ ສາກົນ ເປັນຕົ້ນແມ່ນໃນຂອບອາຊຽນ, ແມ່ນໍ້າຂອງ-ແມ່ນໍ້າລ້ານຊ້າງ ແລະ ອື່ນໆ.