ກຸ່ມບ້ານໂພນງາມນາຝ້າຍ ມອບເຄື່ອງຊ່ວຍເຫລືອໜ່ວຍປ້ອງກັນຂອງເມືອງ ທີ່ບ້ານໄຮຢ່ອນ.

119

ແຫລ່ງຂ່າວຈາກ ເທືອງທຸລະຄົມ ແຂວງວຽງຈັນ ໃຫ້ຮູ້ວ່າ: ວັນທີ 1 ຕຸລາ 2021 ນີ້, ການຈັດຕັ້ງແຕ່ລະບ້ານຂອງກຸ່ມບ້ານໂພນງາມນາຝ້າຍ ນຳໂດຍ ທ່ານ ກົງທອງ ຄໍາຊົມພູ ຫົວໜ້າກຸ່ມບ້ານໂພນງາມນາຝ້າຍ ໄດ້ນໍາເອົາເຄື່ອງຊ່ວຍເຫລືອທີ່ໄດ້ຮັບຈາກປຸກ

ລະດົມຂົນຂວາຍຈາກ ພໍ່ແມ່ປະຊາຊົນ ແລະ ສັງຄົມ ມາມອບໃຫ້ໜ່ວຍປ້ອງກັນຂອງເມືອງທີ່ບ້ານໄຮຢ່ອນ ປະກອບມີເງິນສົດ 2 ລ້ານກີບ, ພ້ອມດ້ວຍນໍ້າດື່ມ, ເຄື່ອງດື່ມ, ກາເຟ ລວມມູນຄ່າທັງໝົດປະມານ 3 ລ້ານກີບ, ເຊິ່ງຕາງໜ້າຮັບໂດຍ ທ່ານ ຈຸມມະນີ ບຸດທະວົງ ຫົວໜ້າກຸ່ມບ້ານຕານປ່ຽວ, ມີ ທ່ານ ກິຄໍາ ວົງໄຊ ຮອງເຈົ້າເມືອງ, ຫົວໜ້າຄະນະສະເພາະກິດເມືອງ,

ການຈັດຕັ້ງບ້ານໃນກຸ່ມຕານປ່ຽວ ແລະ ພາກສ່ວນກ່ຽວຂ້ອງ ເຂົ້າຮ່ວມ.ໂອກາດນີ້, ທ່ານ ກິຄໍາ ວົງໄຊ ໄດ້ຕາງໜ້າການນໍາເມືອງ, ຄະນະກຸ່ມບ້ານຕານປ່ຽວ ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງມາຍັງ ຄະນະກຸ່ມບ້ານໂພນງາມນາຝ້າຍ ກໍຄື

ປະຊາຊົນບັນດາເຜົ່າພາຍໃນກຸ່ມດັ່ງກ່າວ ທີ່ໄດ້ສະຫລະວັດຖຸປັດໄຈ, ເຄື່ອງບໍລິໂພກ ມາມອບໃຫ້ໜ່ວຍປ້ອງກັນຂອງເມືອງໃນເທື່ອນີ້, ພ້ອມຝາກຄວາມເປັນຫ່ວງເປັນໃຍໄປຍັງລູກຫລານ-ພໍ່ແມ່ປະຊາຊົນແຕ່ລະບ້ານ ພາຍໃນກຸ່ມນາຝ້າຍ ແລະ ປະຊາຊົນທຸກຊັ້ນຄົນພາຍໃນເມືອງ ຈົ່ງຢູ່ດີມີແຮງ, ປະກອບສ່ວນປະຕິບັດແຈ້ງການ, ຄໍາສັ່ງຂອງຄະນະສະເພາະກິດທຸກຂັ້ນວາງອອກແຕ່ລະໄລຍະ,

ມີສ່ວນຮ່ວມຢ່າງແຮງແຮງໃນການສະກັດກັ້ນ, ເຝົ້າລະວັງພະຍາດໂຄວິດ-19 ບໍ່ໃຫ້ຂະຫຍາຍໄປຕື່ມອີກ ແລະ ເອົາໃຈໃສ່ປະຕິບັດມາດຕະການປ້ອງກັນຢ່າງເຂັ້ມງວດ. ໃນວັນດຽວກັນ, ທ່ານ ນາງ ກອງແກ້ວ ຄໍາພັນ ຫົວໜ້າກຸ່ມບ້ານນາຄອງ ພ້ອມຄະນະ ໄດ້ນໍາເອົາເງິນສົດ ຈໍານວນ 900.000 ກີບ

ໄປມອບໃຫ້ໜ່ວຍປ້ອງກັນບ້ານຫລິ່ງຊັນ, ໂພນແພງ ແລະ ຫາດສ້ຽວ ບ້ານລະ 300.000 ກີບ ພ້ອມກັບນໍ້າດື່ມຈໍານວນໜຶ່ງ. ພ້ອມກັນນີ້, ຄະນະກອງເລຂາ ໄດ້ສືບຕໍ່ລົງໂຄສະນາ, ປະຊາສໍາພັນ, ປ່າວເຕືອນໃຫ້ພໍ່ແມ່ປະຊາຊົນ

ໃນການຍົກລະດັບມາດຕະການປ້ອງກັນຕົນເອງ ໃຫ້ປອດໄພຈາກເຊື້ອພະຍາດໂຄວິດ-19 ຢູ່ບ້ານບໍ່, ນາບໍ່, ນາເພີຍ, ນາຫວ້າ ແລະ ບ້ານໄຮຢ່ອນ ໂດຍການສະໜອງພາຫະນະ-ເຄື່ອງສຽງຂອງ ໃນການລົງເຄື່ອນໄຫວ ຂອງ ທ່ານ ຄໍາບູ່ ສີຈັນທອນ ຫົວໜ້າໂຮງງານຜະລິດຢາສະໝຸນໄພພື້ນເມືອງລາວ ບ້ານຫາດໄຊ ເມືອງທຸລະຄົມ ແຂວງວຽງຈັນ.ຂ່າວ: ຫ້ອງການ ຖວທ ເມືອງ