ໂອກາດໄປຕໍ່ ຢູ 15 ລາວ ຮິບຮີ່ເຫຼືອອີກ 3 ນັດ ໃຫ້ລຸ້ນ ໃນບານເຕະຊີງແຊັມອາຊຽນ 2019

93

ສະຖານະການຂອງ ທີມຊາດລາວ ຮຸ່ນອາຍຸບໍ່ເກີນ 15 ປີ ໃນການແຂ່ງຂັນບານເຕະຊາຍຊີງແຊັມອາຊຽນ ຮຸ່ນອາຍຸບໍ່ເກີນ 15 ປີ ( AFF U15 BOYS CHAMPIONSHIP THAILAND 2019 ) ທີ່ຈັງຫວັດຊົນບຸຣີ ປະເທດໄທ ຖືວ່າລໍາບາກຖ້າຈະລຸ້ນເຂົ້າຮອບ ຫຼັງເສຍມາ 2 ນັດລວດ ຕາມຫຼັງຄູ່ແຂ່ງ 6 ຄະແນນເຖິງ 3 ທີມ ເຮັດໃຫ້ໂອກາດໄປຕໍ່ຮິບຮີ່ແລ້ວ ເຫຼືອພຽງລຸ້ນໄຊຊະນະໃນລາຍການນີ້ອີກ 3 ນັດ ສຸດທ້າຍ. ການແຂ່ງຂັນບານເຕະຊາຍຊີງແຊັມອາຊຽນ ຮຸ່ນອາຍຸບໍ່ເກີນ 15 ປີ 2019 AFF U15 BOYS

CHAMPIONSHIP 2019 ຈັດຂຶ້ນຢູ່ທີ່ຈັງຫວັດຊົນບຸຣີ ປະເທດໄທ ໃນລະຫວ່າງວັນທີ 27 ກໍລະກົດ ຫາ 9 ສິງຫາ 2019 ມີ 12 ປະເທດເຂົ້າຮ່ວມແຂ່ງຂັນແບ່ງອອກເປັນ 2 ກຸ່ມ ຄື: ກຸ່ມ A ປະກອບມີ ຕີມໍ ເລັສເຕ, ອິນໂດເນເຊຍ, ມຽນມາ, ຫວຽດນາມ, ສິງກະໂປ ແລະ ຟີລິບປິນ, ສ່ວນກຸ່ມ B ປະກອບມີ ມາເລເຊຍ, ອົສຕຣາລີ, ໄທ, ລາວ, ກໍາປູເຈຍ ແລະ ບຣູໄນ.

ຢູ 15 ລາວ ລົງສະໜາມນັດທໍາອິດເສຍໃຫ້ກັບເຈົ້າພາບ ໄທ 1 – 2 ແລະ ຫຼ້າສຸດເມື່ອວັນທີ 30 ກໍລະກົດທີ່ຜ່ານມາ ເສຍໃຫ້ກັບ ອົສຕຣາລີ ໄປຂາດລອຍ 0 – 3 ເຮັດໃຫ້ບໍ່ມີຈັກຄະແນນຈາກ 2 ນັດ ຢູ່ອັນດັບທີ 4 ຂອງຕາຕະລາງຄະແນນລວມ ໂດຍຕາມຫຼັງ ມາເລເຊຍ, ໄທ ແລະ ອົສ ຕຣາລີ ທີ່ມີ 6 ຄະແນນເທົ່າກັນ, ສ່ວນ ກໍາປູເຈຍ ແລະ ບຣູໄນ ກໍຍັງບໍ່ມີຈັກຄະແນນເຊັ່ນກັນຈາກ 2 ນັດ ທໍາອິດ.

ຈາກສະຖານະການຕອນນີ້ຫຼາຍຄົນເລັ່ງເປົ້າທີ່ ຢູ 15 ລາວ ຈະເກັບໄຊຊະນະໃນປີນີ້ໄດ້ ຫຼື ບໍ່? ເພາະລາຍການນີ້ເມື່ອປີ 2018 ທີມຊາດລາວ ສາມາດຊະນະໄດ້ເຖິງ 2 ນັດ ( ຊະນະ ບຣູໄນ ກັບ ສິງກະໂປ ), ສະເໝີ 1 ( ສະເໝີ ໄທ 0 – 0 ) ແລະ ເສຍ 1 ນັດ ( ເສຍໃຫ້ ມາເລເຊຍ 0 – 1 ) ມີ 7 ຄະແນນຢູ່ອັນດັບ 3 ຂອງກຸ່ມບໍ່ພຽງພໍຕໍ່ການເຂົ້າຮອບເພາະໄທ ມີ 10 ຄະແນນ ແລະ ມາເລເຊຍ ມີ 9 ຄະແນນ. ສໍາລັບນັດທີ່ເຫຼືອ ຢູ 15 ລາວ ທີ່ຈະລຸ້ນຊະນະໃນການແຂ່ງຂັນບານເຕະຊີງແຊັມອາຊຽນ 2019

ປະກອບມີ: – ວັນທີ 1 ສິງຫາ 2019 ເວລາ 15:30 ໂມງ ລາວ ພົບ ບຣູໄນ ທີ່ສະໜາມ IPE Chonburi Campus Stadium 2. – ວັນທີ 3 ສິງຫາ 2019 ເວລາ 15:30 ໂມງ ລາວ ພົບ ມາເລເຊຍ ທີ່ສະໜາມ IPE Chonburi Campus Stadium 2. – ວັນທີ 5 ສິງຫາ 2019 ເວລາ 15:00 ໂມງ ລາວ ພົບ ກຳປູເຈຍ ທີ່ສະໜາມ IPE Chonburi Campus Stadium 1.