ກໍາປູເຈຍ ໃຫ້ຈີນ ໃຊ້ຖານທັບແຂວງສີຫະນຸວິລຜ່ານ “ສັນຍາລັບ”

104

ສໍານັກຂ່າວຕ່າງປະເທດລາຍງານຈາກນະຄອນຫຼວງພະນົມເປນ ປະເທດກໍາປູເຈຍ ເມື່ອວັນຈັນ ທີ 22 ກໍລະກົດ ໂດຍອ້າງຈາກລາຍງານຂອງ “ວອລ ສະຕຣີດ ເຈີນັລ” ວ່າ ຈີນ ແລະ ກໍາປູເຈຍ ໄດ້ເຈລະຈາລັບກັນຫຼາຍຄັ້ງ ແລະ ບັນລຸຂໍ້ຕົກລົງຮ່ວມກັນ ເມື່ອຕົ້ນປີນີ້ ໃນການໃຫ້ກອງທັບປົດປ່ອຍປະຊາຊົນຈີນ (PLA) ສາມາດນໍາສິນຊັບທາງທະຫານທີ່ລວມເຖິງເຮືອຮົບ ແລະ ກໍາລັງທະຫານບໍ່ຈໍາກັດຈໍານວນເຂົ້າມາຕິດຕັ້ງ ແລະ ປະຈໍາການທີ່ຖານທັບເຮືອຣຽມ ເຊິ່ງຕັ້ງຢູ່ທີ່ແຂວງພຣະສີຫະນຸ ຫຼື ສີຫະນຸວິລ ເມືອງແຄມຝັ່ງ ທາງພາກຕາເວັນຕົກສຽງໃຕ້ ຂອງປະເທດ ແລະ ສະຖານທີ່ຕັ້ງຂອງຖານແຫ່ງນີ້ ຢູ່ບໍ່ໄກຈາກພື້ນທີ່ກໍ່ສ້າງສະນາມບິນແຫ່ງໃໝ່ ເຊິ່ງເງິນລົງທຶນເກືອບທັງໝົດມາຈາກພາກລັດ ແລະ ເອກະຊົນຂອງຈີນ.

ທັງນີ້ ວອລ ສະຕຣີດ ເຈີນັລ ອ້າງວ່າ ສັນຍາດັ່ງກ່າວ ອະນຸຍາດໃຫ້ຈີນໃຊ້ຖານທັບໃນໄລຍະທໍາອິດໄດ້ດົນເຖິງ 30 ປີ ກ່ອນມີການພິຈາລະນາຂະຫຍາຍໄລຍະເວລາທຸກ 10 ປີ ລັດຖະບານປັກກິ່ງຍັງສະຫງວນທ່າທີຕໍ່ລາຍງານດັ່ງກ່າວ ຂະນະທີ່ ທ່ານເຟີຍສີຟັນ ໂຄສົກລັດຖະບານກໍາປູເຈຍ ປະຕິເສດລາຍງານຂອງວອລ ສະຕຣີດ ເຈີນັລ ໂດຍກ່າວວ່າເປັນ “ຂ່າວປອມ” ເນື່ອງຈາກລັດຖະທໍາມະນູນຂອງກໍາປູເຈຍ ລະບຸຢ່າງຊັດເຈນ ວ່າ ຫ້າມປະເທດໃດກໍ່ຕາມເຂົ້າມາປະຈໍາການທາງທະຫານ ແລະ ອາວຸດ ສ່ວນກະຊວງການຕ່າງປະເທດສະຫະລັດ ອອກຖະແຫຼງການ ຮຽກຮ້ອງໃຫ້ລັດຖະບານພະນົມເປນ “ຍົກເລີກຂໍ້ຕົກລົງສະບັບນີ້ກັບຈີນ ເພື່ອໃຫ້ເປັນໄປຕາມລັດຖະທໍາມະນູນຂອງກໍາປູເຈຍ” ແລະ ສະແດງ “ຄວາມວິຕົກກັງວົນ” ວ່າ ຖ້າກໍາປູເຈຍຍັງເດີນໜ້າຄວາມຮ່ວມມືນີ້ຕໍ່ໄປ ຈະສົ່ງຜົນກະທົບຕໍ່ເສົາຫຼັກດ້ານຄວາມໝັ້ນຄົງ ແລະ ບົດບາດການວາງຕົວເປັນກາງຂອງສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ).

ອີກປະການໜຶ່ງ ກະຊວງປ້ອງກັນປະເທດຂອງສະຫະລັດ ສົ່ງເອກະສານເຖິງສົມເດັດພິໄຊເສນາ ເຕຍ ບັນ ລັດຖະມົນຕີກະຊວງປ້ອງກັນປະເທດຂອງກໍາປູເຈຍ ເມື່ອທ້າຍເດືອນມິຖຸນາ ທີ່ຜ່ານມາ ເພື່ອຂໍຄໍາອະທິບາຍ ແລະ ຕັ້ງຂໍ້ສັງເກດດ້ວຍວ່າ ການທີ່ສົມເດັດຮຸນເຊນ ນາຍົກລັດຖະມົນຕີກໍາປູເຈຍ ປະຕິເສດຄວາມຊ່ວຍເຫຼືອຈາກລັດຖະບານວໍຊິງຕັນ ໃນການບູລະນະປັບປຸງຖານທັບເຮືອຣຽມຈະເປັນການເປີດໂອກາດໃຫ້ແກ່ຈີນໃນອະນາຄົດ ຫຼື ບໍ່.